പാപ്പിനിശ്ശേരി: അഴീക്കോട് കടപ്പുറം റോഡിലെ ബസ് സ്റ്റോപ്പിന് സമീപത്തെ വീട്ടില്‍നിന്ന് 45 ലിറ്റര്‍ വിദേശ മദ്യം പിടികൂടി. നാട്ടുകാരില്‍നിന്ന് ലഭിച്ച പരാതിയെ തുടര്‍ന്നാണ് എക്‌സൈസ് സംഘം റെയ്ഡ് നടത്തിയത്. പൂതപ്പാറ തൂന്നോളി ഹൗസിലെ പ്രീത (51) ആണ് പിടിയിലായത്.
പ്രതിയെ അനധികൃത വിദേശ മദ്യം സൂക്ഷിച്ച് വില്‍പന നടത്തിയെന്ന കേസ് ചുമത്തി അറസ്റ്റ് ചെയ്ത് കോടതിയില്‍ ഹാജരാക്കി റിമാന്‍ഡ് ചെയ്തു. വ്യാഴാഴ്ച രാത്രി പാപ്പിനിശ്ശേരി എക്‌സൈസ് ഇന്‍സ്‌പെക്ടര്‍ എ. ഹേമന്ത് കുമാറിന്റെ നേതൃത്വത്തിലുള്ള സംഘം നടത്തിയ റെയ്ഡിലാണ് 45.280 ലിറ്റര്‍ മദ്യം പിടികൂടിയത്. വര്‍ഷങ്ങളായി ഇവര്‍ വീട്ടില്‍വച്ച് മദ്യക്കച്ചവടം നടത്തുന്നുണ്ടെന്ന രഹസ്യവിവരത്തിന്റെ അടിസ്ഥാനത്തിലാണ് എക്‌സൈസ് സംഘം എത്തിയത്. അസിസ്റ്റന്റ് എക്‌സൈസ് ഇന്‍സ്‌പെക്ടര്‍ കെ. സുധാകരന്‍, പ്രിവന്റിവ് ഓഫിസര്‍മാരായ അഡോണ്‍ ഗോസ്പ്രഡ്, സിവില്‍ പൊലിസ് ഓഫിസര്‍മാരായ എം. രാജീവന്‍, കെ. ദീപക്, എം. സുജിത്ത് എന്നിവരും സംഘത്തിലുണ്ടായിരുന്നു.