ഗൂഡല്ലൂര്‍: മുതുമല കടുവാ സങ്കേതത്തില്‍ കന്നുകാലികള്‍ കൊക്കയിലേക്ക് വീണ് ചത്ത സംഭവത്തില്‍ അന്വേഷണം നടത്തണമെന്നാവശ്യപ്പെട്ട് ഉടമകള്‍ പൊലിസില്‍ പരാതി നല്‍കി. മസിനഗുഡി സ്വദേശികളായ ഹംസ, ഉസൈന്‍, ഗഫൂര്‍ എന്നിവരുടെ എഴുപതോളം എരുമകളാണ് സങ്കേതത്തിലെ 500 അടി താഴ്ചയുള്ള കൊക്കയിലേക്ക് വീണു ചത്ത നിലയില്‍ കണ്ടത്.
സംഭവത്തില്‍ ദുരൂഹതയുണ്ടെന്നും വനത്തില്‍ പ്രവേശിച്ച എരുമകളെ വനപാലകര്‍ കൊക്കയിലേക്ക് തള്ളിയിട്ടതാണെന്നും ഇവര്‍ പരാതിയില്‍ ആരോപിച്ചു. എന്നാല്‍ കന്നുകാലികള്‍ കാലുവഴുതി വീണാണ് ചത്തതെന്നാണ് വനം വകുപ്പ് അധികൃതര്‍ പറയുന്നത്. വനം വകുപ്പിന്റെ അനുമതിയോടെ നടത്തിയ പരിശോധനയിലാണ് മുതുമല കടുവാ സങ്കേതത്തോട് ചേര്‍ന്നുള്ള ഉള്‍വനത്തിലെ കൊക്കയിലാണ് കാലികളെ ചത്ത നിലയില്‍ കണ്ടെത്തിയത്. മസിനഗുഡിയില്‍ നിന്ന് 15 കിലോമീറ്ററോളം ഉള്ളിലാണ് ഈ പ്രദേശം. വനത്തില്‍ കാലികളെ മേയാന്‍ വിടുന്നത് വനം വകുപ്പ് നിരോധിച്ചിരുന്നു.