ന്യൂയോര്‍ക്ക്: യു.എസ് ഇറാന്‍ സെന്‍ട്രല്‍ ബാങ്കിനുമേല്‍ പുതുതായി ഉപരോധമേര്‍പ്പെടുത്തുന്നത് ജനങ്ങള്‍ക്ക് ഭക്ഷണവും മരുന്നും ലഭിക്കുന്നത് തടയാനാണെന്ന് ഇറാന്‍ വിദേശകാര്യമന്ത്രി മുഹമ്മദ് ജവാദ് ദാരിഫ്. പരമാവധി സമ്മര്‍ദം ചെലുത്തുക എന്ന തന്ത്രമനുസരിച്ച് ഇത്രയും കഷ്ടപ്പെടുത്തിയിട്ടും ഇറാന്‍ തളരാത്തതിലുള്ള യു.എസിന്റെ നിരാശയാണ് ഇതിലൂടെ പ്രകടമാവുന്നത്.
അതേസമയം ഇത് അപകടകരമായ നടപടിയാണെന്നും അടുത്തയാഴ്ച നടക്കുന്ന യു.എന്‍ പൊതുസഭയില്‍ സംബന്ധിക്കാന്‍ ന്യൂയോര്‍ക്കിലെത്തിയ അദ്ദേഹം പറഞ്ഞു. നേരത്തെ സഊദി അരാംകോയ്ക്കു നേരെയുള്ള ഹൂതി ആക്രമണത്തില്‍ തങ്ങള്‍ക്കു പങ്കില്ലെന്ന് ഇറാന്‍ വ്യക്തമാക്കിയിരുന്നു.
ബുധനാഴ്ച 2015ലെ ആണവകരാറില്‍ ഒപ്പുവച്ച വിവിധ രാജ്യങ്ങളിലെ വിദേശകാര്യമന്ത്രിമാരെ ബുധനാഴ്ച താന്‍ കാണുന്നുണ്ടെന്നും ദരീഫ് അറിയിച്ചു. അതിനിടെ ഇറാന്‍ എണ്ണ നിരവധി രാജ്യങ്ങള്‍ക്ക് ആവശ്യമുണ്ടെന്നിരിക്കെ യു.എസ് തനിച്ച് ലോകത്തെ സാമ്പത്തിക ശക്തിയായി തുടരുക സാധ്യമല്ലെന്ന് അവര്‍ തിരിച്ചറിയുമെന്ന് പ്രതീക്ഷിക്കുന്നതായി ഇറാന്‍ വിദേശകാര്യമന്ത്രാലയ വക്താവ് അബ്ബാസ് മൂസവി പറഞ്ഞു.