ന്യൂഡല്‍ഹി: മേഘാലയ ഹൈക്കോടതിയിലേക്ക് സ്ഥലം മാറ്റിയതിനെത്തുടര്‍ന്ന് രാജിവച്ച മദ്രാസ് ഹൈക്കോടതി ചീഫ് ജസ്റ്റിസ് വിജയ കമലേഷ് താഹില്‍ രമണിയുടെ രാജി രാഷ്ട്രപതി അംഗീകരിച്ചു. ഇതു സംബന്ധിച്ച് നിയമമന്ത്രാലയം വിജ്ഞാപനം പുറപ്പെടുവിച്ചു.
ഹൈക്കോടതി ജഡ്ജിയായി 2020 ഒക്ടോബര്‍ മൂന്ന് വരെ കാലാവധി ബാക്കിയിരിക്കെയാണ് രാജി. ഇതോടനുബന്ധിച്ച് മദ്രാസ് ഹൈക്കോടതിയിലെ മുതിര്‍ന്ന ജഡ്ജിയായ വിനീത് കോത്താരിയെ മദ്രാസ് ഹൈക്കോടതി ആക്ടിങ് ചീഫ് ജസ്റ്റിസായി നിയമിച്ചു.
തന്നെ മാറ്റിയതിനെതിരേ താഹില്‍ രമണി നല്‍കിയ അപ്പീല്‍ ഈ മാസം മൂന്നിന് ചേര്‍ന്ന സുപ്രിംകോടതി കൊളീജിയം തള്ളിയിരുന്നു. 2001 ജൂണില്‍ ബോംബെ ഹൈക്കോടതി ജഡ്ജിയായി നിയമിതയായ താഹില്‍ രമണി 2018 ഓഗസ്റ്റിലാണ് മദ്രാസ് ഹൈക്കോടതി ചീഫ് ജസ്റ്റിസായി നിയമിതയായത്. ബോംബെ ഹൈക്കോടതിയിലിരിക്കെയാണ് താഹില്‍ രമണി ബില്‍ക്കീസ് ഭാനു കേസില്‍ വിധി പറഞ്ഞത്.
സുപ്രിം കോടതി ചീഫ് ജസ്റ്റിസ് രഞ്ജന്‍ ഗൊഗോയ് അധ്യക്ഷനായ കൊളീജിയമാണ് മദ്രാസ് ഹൈക്കോടതി ചീഫ് ജസ്റ്റിസായിരുന്ന താഹില്‍ രമണിയെ മേഘാലയ ഹൈക്കോടതി ചീഫ് ജസ്റ്റിസാക്കിഉത്തരവ് പുറപ്പെടുവിച്ചത്.
അതിനിടയില്‍ താഹില്‍ രമണിയെ മാറ്റികൊണ്ടുള്ള കൊളീജിയത്തിന്റെ തീരുമാനത്തിന് രാഷ്ട്രപതി അംഗീകാരം നല്‍കുന്നത് തടയണമെന്ന് ആവശ്യപ്പെട്ടുള്ള പൊതുതാല്‍പര്യ ഹരജി കഴിഞ്ഞ ദിവസം മദ്രാസ് ഹൈക്കോടതിയുടെ മുന്‍പാകെ വന്നിരുന്നു.
ഇതിനു പിന്നാലെയാണ് രാഷ്ട്രപതി രാജി അംഗീകരിച്ചത്. ഇതോടെ ഹരജിയുടെ പ്രസക്തി ഇല്ലാതായി.