സ്വന്തം ലേഖകന്‍
തിരുവനന്തപുരം: ഉപതെരഞ്ഞെടുപ്പ് പ്രഖ്യാപിച്ച അഞ്ച് നിയമസഭാ മണ്ഡലങ്ങളില്‍ പ്രചാരണത്തിനും മറ്റുമായി ലഭിക്കുക 30ല്‍ താഴെ ദിനങ്ങള്‍ മാത്രം.
നാമനിര്‍ദേശപത്രിക സമര്‍പ്പിക്കുന്നതിനുള്ള അവസാന തിയതി ഈ മാസം 30 ആയതിനാല്‍ ഏറെ ചര്‍ച്ചകളിലേക്ക് കടക്കാതെ സ്ഥാനാര്‍ഥികളെ കണ്ടെത്തേണ്ടിവരും. അതിനാല്‍ സ്ഥാനാര്‍ഥികളെ സംബന്ധിച്ചുള്ള അനൗദ്യോഗിക ചര്‍ച്ചകള്‍ക്ക് ജീവന്‍വച്ചിട്ടുണ്ട്.
സി.പി.എം. സംസ്ഥാന സെക്രട്ടേറിയറ്റ് 24ന് ചേരുന്നുണ്ട്. അതിനുള്ളില്‍ അതത് ജില്ലാ കമ്മിറ്റികള്‍ യോഗം ചേര്‍ന്ന് സ്ഥാനാര്‍ഥികളുടെ ചുരുക്കപ്പട്ടിക കൈമാറും. ഇതിനകംതന്നെ നിരവധി ചര്‍ച്ചകള്‍ നടന്നുകഴിഞ്ഞതിനാല്‍ സ്ഥാനാര്‍ഥി ആരായിരിക്കണമെന്ന നിര്‍ദേശമായിരിക്കും ജില്ലാ കമ്മിറ്റികള്‍ സെക്രട്ടേറിയറ്റിന് നല്‍കുക. സമയപരിമിതിയുള്ളതിനാല്‍ കോണ്‍ഗ്രസിലും സ്ഥാനാര്‍ഥി ചര്‍ച്ചകള്‍ സജീവമാണ്. കോന്നിയില്‍ ശരത്ചന്ദ്ര പ്രസാദും എറണാകുളത്ത് കെ.വി തോമസും അരൂരില്‍ ഷാനിമോള്‍ ഉസ്മാനും സ്ഥാനാര്‍ഥിയാകുമെന്ന തരത്തിലുള്ള അന്തിമ ചര്‍ച്ചകളാണ് പുരോഗമിക്കുന്നത്.
വട്ടിയൂര്‍ക്കാവില്‍ സ്ഥാനാര്‍ഥിക്കായി വടംവലി നടക്കുകയാണ്. പി.സി വിഷ്ണുനാഥിനെയാണ് പാര്‍ട്ടി പരിഗണിക്കുന്നതെങ്കിലും മനുഷ്യാവകാശ കമ്മിഷന്‍ അംഗവും തിരുവനന്തപുരം ഡി.സി.സി മുന്‍പ്രസിഡന്റുമായ കെ. മോഹന്‍ കുമാറിനുവേണ്ടിയും ചരടുവലി നടക്കുന്നുണ്ട്. നിലവിലെ ഡി.സി.സി പ്രസിഡന്റ് നെയ്യാറ്റിന്‍കര സനല്‍, മുന്‍ എം.പി.പീതാംബരക്കുറുപ്പ്, ശരത് ചന്ദ്രപ്രസാദ് എന്നിവരുടെ പേരുകളും ചര്‍ച്ചയിലുണ്ട്.
കോന്നിയില്‍ ഈഴവ സ്ഥാനാര്‍ഥി വരണമെന്ന പ്രാദേശിക എസ്.എന്‍.ഡി.പി നേതാക്കളുടെ ആവശ്യമാണ് ശരത്ചന്ദ്ര പ്രസാദിന് തുണയായിരിക്കുന്നത്.
കോന്നിയില്‍ ജാതിസമവാക്യം ഉണ്ടാകണമെന്ന ആവശ്യം പ്രാദേശിക എസ്.എന്‍.ഡി.പി നേതൃത്വം കെ.പി.സി.സിയെ അറിയിച്ചിട്ടുണ്ട്. ശരത്ചന്ദ്രപ്രസാദിനെ കോന്നിയിലേക്ക് പരിഗണിക്കുന്നതില്‍ പാര്‍ട്ടി അധ്യക്ഷന്‍ മുല്ലപ്പള്ളി രാമചന്ദ്രന്റെയും താല്‍പര്യമുണ്ട്.
അതേസമയം, ഡി.സി.സി പ്രസിഡന്റ് ബാബു ജോര്‍ജും സ്ഥാനാര്‍ഥിയാകണമെന്ന ആവശ്യം പാര്‍ട്ടിയെ അറിയിച്ചിട്ടുണ്ട്. ഡി.സി.സി മുന്‍ പ്രസിഡന്റ് മോഹന്‍രാജും കെ.പി.സി.സി ജോയിന്റ് സെക്രട്ടറി ത്രിവിക്രമന്‍ തമ്പിയും കോന്നിക്കായി രംഗത്തുണ്ട്.
അരൂരിലും ഈഴവ സ്ഥാനാര്‍ഥിയെ നിര്‍ത്തണമെന്ന ആവശ്യം ഉയര്‍ന്നിട്ടുണ്ട്. എന്നാല്‍, കഴിഞ്ഞ ലോക്‌സഭാ തെരഞ്ഞെടുപ്പില്‍ ആലപ്പുഴയില്‍ മത്സരിച്ച ഷാനിമോള്‍ ഉസ്മാനെ മത്സരിപ്പിക്കാനാണ് പാര്‍ട്ടിക്ക് താല്‍പര്യം. കെ.പി.സി.സി ഭാരവാഹിയായ ജയപ്രകാശിനെ മത്സരിപ്പിക്കണമെന്നാവശ്യപ്പെട്ട് പ്രാദേശിക നേതൃത്വവും രംഗത്തുണ്ട്.
ബി.ജെ.പിയും സ്ഥാനാര്‍ഥികള്‍ക്കായി അനൗദ്യോഗിക ചര്‍ച്ചകള്‍ തുടങ്ങിക്കഴിഞ്ഞു. വട്ടിയൂര്‍ക്കാവില്‍ മത്സരിക്കണമെന്ന ആവശ്യവുമായി വി.വി രാജേഷ് ശക്തമായി രംഗത്തുണ്ട്.
ബി.ജെ.പി ജില്ലാ പ്രസിഡന്റ് എസ്.സുരേഷും രംഗത്തുണ്ടെങ്കിലും കുമ്മനം രാജശേഖരനെ സ്ഥാനാര്‍ഥിയാക്കി മണ്ഡലം പിടിച്ചെടുക്കണമെന്ന ആലോചനയും സജീവമാണ്. കോന്നിയില്‍ കെ.സുരേന്ദ്രന്റെയും ശോഭാ സുരേന്ദ്രന്റെയും പേരുകളും മഞ്ചേശ്വരത്ത് രവീശ തന്ത്രി കുണ്ടാര്‍, എ.പി അബ്ദുള്ളക്കുട്ടി എന്നിവരുടെ പേരുകളും ചര്‍ച്ച ചെയ്യുന്നുണ്ട്. അരൂര്‍ മണ്ഡലം ബി.ഡി.ജെ.എസിന് നല്‍കാനും തുഷാര്‍ വെള്ളാപ്പള്ളിയെ സ്ഥാനാര്‍ഥിയാക്കുന്നതിനുമാണ് ആലോചന.