ന്യൂഡല്‍ഹി: മധ്യപ്രദേശില്‍ കര്‍ഷക പ്രക്ഷോഭത്തിനു നേരെ പൊലിസ് നടത്തിയ വെടിവയ്പില്‍ ആറ് കര്‍ഷകര്‍ മരിക്കാനിടയായ സംഭവം രാജ്യത്ത് കത്തിപ്പടരുമ്പോള്‍ ബിഹാറില്‍ ബാബ രാംദേവിന്റെ യോഗ പരിപാടിയില്‍ പങ്കെടുത്ത് വിവാദത്തിലായ കേന്ദ്ര കൃഷി മന്ത്രി രാധാ മോഹന്‍ സിങിന് വീണ്ടുവിചാരം.
ഇപ്പോഴും രാജ്യത്താകമാനം കര്‍ഷക പ്രതിഷേധം കത്തിപ്പടരുന്ന സാഹചര്യത്തില്‍ വിവാദമൊഴിവാക്കാന്‍ അദ്ദേഹം ഇന്ന് നടത്താനിരുന്ന ചൈനീസ് സന്ദര്‍ശനം റദ്ദാക്കി.
ബെയ്ജിങില്‍ നടക്കുന്ന ത്രിദിന കാര്‍ഷിക സഹകരണ ഗ്രൂപ്പുകളുടെ സമ്മേളനത്തില്‍ പങ്കെടുക്കാനുള്ള തീരുമാനമാണ് മന്ത്രി മാറ്റിവച്ചത്. യോഗ പരിപാടിയില്‍ പങ്കെടുത്ത് കര്‍ഷക പ്രക്ഷോഭത്തിനെതിരേ നടത്തിയ അദ്ദേഹത്തിന്റെ പരാമര്‍ശം വിവാദങ്ങള്‍ക്ക് വഴിവച്ചിരുന്നു.