മാഡ്രിഡ്: പത്താം ഫ്രഞ്ച് ഓപണ്‍ കിരീടം നേടി ചരിത്രമെഴുതിയ സ്പാനിഷ് താരം റാഫേല്‍ നദാല്‍ സീസണ്‍ അവസാനം നടക്കുന്ന എ.ടി.പി വേള്‍ഡ് ടൂര്‍ ഫൈനലിന് യോഗ്യത നേടി. ഫ്രഞ്ച്  ഓപണടക്കം ഈ സീസണില്‍ നാല് കിരീടങ്ങളും 46 വിജയങ്ങളും നേടിയാണ് നദാല്‍ സീറ്റുറപ്പിച്ചത്. ആറ് മത്സരങ്ങളില്‍ മാത്രമാണ് സ്പാനിഷ് താരം തോല്‍വി അറിഞ്ഞത്. 2017 എ.ടി.പി വേള്‍ഡ് ടൂര്‍ ഫൈനല്‍സിന് യോഗ്യത നേടുന്ന ആദ്യ താരമായും നദാല്‍ മാറി. ഇതുവരെ എ.ടി.പി വേള്‍ഡ് ടൂര്‍ കിരീടം സ്വന്തമാക്കാന്‍ സാധിച്ചിട്ടില്ലാത്ത നദാല്‍ രണ്ട് തവണ രണ്ടാം സ്ഥാനത്തെത്തിയിരുന്നു. 2010ല്‍ റോജര്‍ ഫെഡററോടും 2013ല്‍ നൊവാക് ദ്യോക്കോവിചിനോടും ഫൈനലില്‍ പരാജയമേറ്റ് വാങ്ങാനായിരുന്നു താരത്തിന്റെ യോഗം.