എരുമപ്പെട്ടി: വെള്ളറക്കാട് വെള്ളത്തേരി പ്രദേശത്ത് നിരന്തരം മലമ്പാമ്പുകളെ കാണുന്നത് നാട്ടുകാരെ ആശങ്കയിലാക്കുന്നു. കഴിഞ്ഞ ഒരുമാസത്തിനുള്ളില്‍ ആറിലധികം മലമ്പാമ്പുകളെയാണ് മേഖലയില്‍നിന്നും പിടികൂടിയത്.
കഴിഞ്ഞ ദിവസം രാത്രിയില്‍ വെള്ളത്തേരിയില്‍ നിന്നും വീണ്ടും ഒരു മലമ്പാമ്പിനെ പിടികൂടിയിരുന്നു. ഇതിനിടയില്‍ നാട്ടുകാരനായ അസീബിന് മലമ്പാമ്പിന്റെ കടിയേറ്റു. പിടികൂടുന്നതിനിടയില്‍ അസീബിന്റെ കൈത്തണ്ടയിലാണ് പാമ്പ് കടിച്ചത്.
മലമ്പാമ്പുകളെ ഏറ്റെടുക്കാന്‍ ഫോറസ്റ്റ് ഉദ്യോഗസ്ഥര്‍ എത്തുന്നില്ലെന്നും ആക്ഷേപമുണ്ട്. എരുമപ്പെട്ടി ഫോറസ്റ്റ് സ്റ്റേഷനില്‍ വാഹന സൗകര്യമില്ലാത്തതിനാലാണ് ഉദ്യോഗസ്ഥര്‍ സ്ഥലത്തെത്താന്‍ കഴിയാത്തതിന് കാരണമെന്ന് പറയുന്നു.
ഈ സാഹചര്യത്തില്‍ പിടികൂടിയ മലമ്പാമ്പുകളെ ദിവസങ്ങളോളം ചാക്കിലാക്കി സൂക്ഷിക്കേണ്ട അവസ്ഥയാണുള്ളതെന്നും ഇത് സംബന്ധിച്ച് വകുപ്പ് മന്ത്രിക്കും ജില്ലാ കലക്ടര്‍ക്കും നിവേദനം നല്‍കുമെന്നും കടങ്ങോട് പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ ജലീല്‍ ആദൂര്‍ അറിയിച്ചു.