റിയാദ്: രാജ്യത്തെ ഇന്‍ഷുറന്‍സ് കമ്പനികളില്‍ പ്രഖ്യാപിച്ച സഊദിവല്‍ക്കരണം അടുത്ത മാസം രണ്ടു മുതല്‍ പ്രാബല്യത്തില്‍ വരും. വെഹിക്കിള്‍ ക്ലെയിം മാനേജ്‌മെന്റ്, കസ്റ്റമര്‍ കെയര്‍ ജോലികളാണ് ആദ്യ ഘട്ടത്തില്‍ സമ്പൂര്‍ണ സ്വദേശിവല്‍ക്കരണം നടത്തുന്നത്. സഊദി അറേബ്യന്‍ മോണിട്ടറി അതോറിറ്റി (സാമ) യുടെ തീരുമാന പ്രകാരമാണ് തൊഴില്‍ മന്ത്രാലയം ഇതു നടപ്പിലാക്കുന്നത്. ഇന്‍ഷുറന്‍സ് കമ്പനികളിലെ കൂടുതല്‍ തൊഴിലുകള്‍ പിന്നീട് ഘട്ടം ഘട്ടമായി സഊദി വല്‍ക്കരിക്കാനാണ് പദ്ധതിയില്‍ ഉന്നത തസ്തികകളും സാങ്കേതിക ജോലികളും ഉള്‍പ്പെടെ മുഴുവന്‍ തൊഴിലുകളും പൂര്‍ണമായും സ്വദേശി വല്‍ക്കരിക്കാനാണ് സാമ ലക്ഷ്യമിടുന്നത്.

കഴിഞ്ഞ വര്‍ഷത്തെ കണക്കുകള്‍ പ്രകാരം ഇന്‍ഷുറന്‍സ് കമ്പനികള്‍ 58 ശതമാനം സ്വദേശിവല്‍ക്കരണം നടപ്പിലാക്കിയിട്ടുണ്ട്. ഇന്‍ഷുറന്‍സ് കമ്പനികളിലെ സഊദി വല്‍ക്കരണം ഇനിയും ഉയര്‍ത്തുന്നതിനാണ് ആഗ്രഹിക്കുന്നതെന്ന് സാമ ഗവര്‍ണര്‍ ഡോ. അഹ്മദ് അല്‍ഖുലൈഫി പറഞ്ഞു. കമ്പനികളിലെ ഉയര്‍ന്ന തൊഴിലുകളും സാങ്കേതിക ജോലികളും പൂര്‍ണമായും സഊദിവല്‍ക്കരിക്കും. ഇതിനു മുന്നോടിയായി ഇത്തരം തൊഴിലുകളില്‍ കമ്പനികള്‍ സൗദികള്‍ക്ക് പരിശീലനം നല്‍കണമെന്നും വ്യവസ്ഥയുണ്ട്.
റമദാന്‍ അവസാനത്തോടെ തന്നെ ക്ലെയിം മാനേജ്‌മെന്റ്, കസ്റ്റമര്‍ കെയര്‍ ജോലികള്‍ കമ്പനികള്‍ പൂര്‍ണമായും സഊദിവല്‍ക്കരിക്കണമെന്ന് സാമ ഗവര്‍ണര്‍ ആവശ്യപ്പെട്ടു.