ഇസ്‌ലാമാബാദ്: യു.എന്‍ പൊതുസഭാ സമ്മേളനത്തില്‍ പങ്കെടുക്കാനായി പാക് പ്രധാനമന്ത്രി ഇമ്രാന്‍ഖാന്‍ അമേരിക്കയിലെത്തി. സഊദി കിരീടാവകാശി നല്‍കിയ പ്രത്യേക വിമാനത്തിലാണ് ഇമ്രാന്‍ഖാന്‍ പോയത്. യു.എന്‍ സമ്മേളനത്തിന് പോകാനായി യാത്രാവിമാനം ഉപയോഗിക്കാനായിരുന്നു ഇമ്രാന്‍ഖാന്‍ ആദ്യം പദ്ധതിയിട്ടിരുന്നത്. എന്നാല്‍ അദ്ദേഹത്തെ അതിഥിയായി കണക്കാക്കിയാണ് സഊദി കിരീടാവകാശി ഇമ്രാന്‍ഖാന് വേണ്ടി പ്രത്യേക വിമാനം നല്‍കിയത്.
അമേരിക്കയിലേക്ക് പോകുന്നതിന് മുന്‍പായി ഇമ്രാന്‍ഖാന്‍ സഊദി സന്ദര്‍ശിച്ചിരുന്നു. ഈ സന്ദര്‍ശനത്തിനിടെയാണ് സഊദി കിരീടാവകാശി മുഹമ്മദ് ബിന്‍ സല്‍മാന്‍ പാക് പ്രധാനമന്ത്രിയുടെ യാത്രയ്ക്കായി പ്രത്യേക വിമാനം ഏര്‍പ്പാടാക്കി നല്‍കിയത്. ഇമ്രാന്‍ഖാന്‍ ഇന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപുമായി കൂടിക്കാഴ്ച നടത്തും. ചൊവ്വാഴ്ചയാണ് ഇന്ത്യന്‍ പ്രധാനമന്ത്രി നരേന്ദ്രമോദി ട്രംപുമായി കൂടിക്കാഴ്ച നടത്തുക.
രാജ്യത്ത് സാമ്പത്തിക പ്രതിസന്ധി നിലനില്‍ക്കുന്നതിനാല്‍ ചെലവ് വെട്ടിച്ചുരുക്കുന്നതിന് വേണ്ടിയാണ് ഇമ്രാന്‍ഖാന്‍ വിദേശയാത്രയ്ക്ക് പ്രത്യേക വിമാനത്തിന് പകരം യാത്രാവിമാനം ഉപയോഗിക്കുന്നത്. മുന്‍പും അമേരിക്കന്‍ സന്ദര്‍ശനത്തിന് ഇമ്രാന്‍ഖാന്‍ യാത്രാവിമാനം ഉപയോഗിച്ചത് വാര്‍ത്തയായിരുന്നു. കശ്മിര്‍ വിഷയത്തില്‍ പിന്തുണ തേടുന്നതിനായിരുന്നു ഇമ്രാന്റെ രണ്ടുദിവസത്തെ സഊദി സന്ദര്‍ശനം. യു.എന്‍ പൊതുസഭാ സമ്മേളനത്തില്‍ കശ്മിര്‍ വിഷയം ഉയര്‍ത്താനാണ് പാകിസ്താന്‍ ശ്രമിക്കുന്നത്.
അതേസമയം കശ്മിര്‍ ആഭ്യന്തരവിഷയമായതിനാല്‍ ഇന്ത്യ യു.എന്നില്‍ ഉന്നയിക്കില്ലെന്ന് മോദി വ്യക്തമാക്കിയിരുന്നു. ഇന്ത്യയും പാകിസ്താനും ആവശ്യപ്പെടുകയാണെങ്കില്‍ കശ്മിര്‍ വിഷയത്തില്‍ യു.എന്‍ ഇടപെടാമെന്നാണ് സെക്രട്ടറി ജനറല്‍ അന്റോണിയോ ഗുട്ടറസ് പറഞ്ഞത്. ഈമാസം 27നാണ് പാക് പ്രധാനമന്ത്രി യു.എന്‍ പൊതുസഭാ സമ്മേളനത്തെ അഭിസംബോധന ചെയ്യുക.
അതേസമയം യു.എസിലെത്തിയ പാക് പ്രധാനമന്ത്രിയെ സ്വീകരിക്കാന്‍ ട്രംപ് ഭരണകൂടത്തിന്റെ പ്രതിനിധിയായി ആരും എത്താതിരുന്നത് ശ്രദ്ധേയമായി. പാകിസ്താന്റെ യു.എന്‍ പ്രതിനിധി മലീഹ ലോധി മാത്രമേ ഇമ്രാനെ സ്വീകരിക്കാന്‍ വിമാനത്താവളത്തില്‍ ഉണ്ടായിരുന്നുള്ളൂ.
അതേസമയം ഇന്ത്യന്‍ പ്രധാനമന്ത്രിയെ ഇന്ത്യയിലെ യു.എസ് അംബാസിഡര്‍ കെന്നത്ത് ജസ്റ്റര്‍, വാണിജ്യ-അന്താരാഷ്ട്ര കാര്യ ഡയരക്ടര്‍ ക്രിസ്റ്റഫര്‍ ഒള്‍സന്‍, മറ്റു ഉദ്യോഗസ്ഥര്‍ എന്നിവര്‍ ചേര്‍ന്നാണ് സ്വീകരിച്ചത്.