പട്‌ന: പാകിസ്താന് മുന്നറിയിപ്പുമായി വീണ്ടും പ്രതിരോധ മന്ത്രി രാജ്‌നാഥ് സിങ്. 1965ലെയും 1971ലെയും തെറ്റുകള്‍ ആവര്‍ത്തിക്കരുതെന്ന് അദ്ദേഹം പാകിസ്താനെ ഓര്‍മിപ്പിച്ചു. ബിഹാറിലെ പട്‌നയില്‍ ജനജാഗരണ്‍ സഭ എന്ന പരിപാടിയില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
ഇന്ത്യയുടെ പടിഞ്ഞാറന്‍ അയല്‍ക്കാര്‍ ആ രാജ്യത്ത് മനുഷ്യാവകാശ ലംഘനങ്ങളിലൂടെ ശിഥിലീകരിക്കുകയാണെന്നും രാജ്‌നാഥ് സിങ് ആരോപിച്ചു.
തെറ്റുകള്‍ ആവര്‍ത്തിക്കാതിരിക്കുകയാണ് പാകിസ്താന്‍ ചെയ്യേണ്ടത്. ഏതെങ്കിലും കാരണത്താല്‍ അവര്‍ തെറ്റുകള്‍ ആവര്‍ത്തിക്കുകയാണെങ്കില്‍, പാക് അധീന കശ്മിരില്‍ പിന്നീട് എന്തായിരിക്കും സംഭവിക്കുക എന്നത് അവര്‍ ചിന്തിക്കണം.
ബലൂചിസ്ഥാനിലും പഷ്തൂണിലും വ്യാപകമായ രീതിയില്‍ മനുഷ്യാവകാശ ലംഘനങ്ങള്‍ നടക്കുകയാണ്. ഇത് തുടരുകയാണെങ്കില്‍ ഒരു ശക്തികള്‍ക്കും പാകിസ്താന്റെ ശിഥിലീകരണത്തെ തടയാന്‍ കഴിയില്ലെന്നും രാജ്‌നാഥ് സിങ് പറഞ്ഞു.