മലപ്പുറം: രാജ്യത്തെ ഉന്നതവിദ്യാഭ്യാസരംഗം സമ്പൂര്‍ണമായി ഡിജിറ്റലാകുന്നു. ഇതിന്റെ ഭാഗമായി രാജ്യത്തെ ഉന്നതവിദ്യാഭ്യാസ സ്ഥാപനങ്ങളിലെ ഡിജിറ്റല്‍ സാങ്കേതിക സൗകര്യങ്ങളുടെ വിവരശേഖരണം നടത്താന്‍ യു.ജി.സി നിര്‍ദേശം നല്‍കി.
പഠന-പാഠ്യേതര പ്രവര്‍ത്തനങ്ങള്‍ ലോകത്താകമാനം ഡിജിറ്റല്‍ വല്‍ക്കരിച്ചിട്ടുണ്ട്. ഈ മാറ്റങ്ങള്‍ രാജ്യത്തെ മുഴുവന്‍ ഉന്നതവിദ്യാഭ്യാസ സ്ഥാപനങ്ങളിലും ഉറപ്പാക്കുന്നതിന്റെ ഭാഗമായാണ് ഓണ്‍ലൈന്‍ സര്‍വേ നടത്താന്‍ യു.ജി.സി തീരുമാനിച്ചിരിക്കുന്നത്. ഇതിനായി നിശ്ചിത ചോദ്യാവലിയും തയാറാക്കി.വിദ്യാര്‍ഥികളുടെ പഠനം, ആശയവിനിമയം, ഇതരവിദ്യാഭ്യാസ സ്ഥാപനങ്ങളുമായുള്ള സമ്പര്‍ക്കം തുടങ്ങിയ കാര്യങ്ങള്‍ ഡിജിറ്റല്‍ പാഠ്യപദ്ധതിയിലൂടെ എളുപ്പമാവും.
സമഗ്രമായ രീതിയില്‍ പദ്ധതി നടപ്പാക്കുന്നതോടെ രാജ്യത്തെ ഉന്നതവിദ്യാഭ്യാസ രംഗം മറ്റൊരു ഘട്ടത്തിലേക്ക് കടക്കുമെന്ന് യു.ജി.സി അധികൃതര്‍ അവകാശപ്പെടുന്നു. ഏഴ് ചോദ്യങ്ങളടങ്ങിയ ഓണ്‍ലൈന്‍ സര്‍വേക്കായി യു.ജി.സി വെബ്‌സൈറ്റില്‍ പ്രത്യേക ലിങ്കും ഒരുക്കിയിട്ടുണ്ട്.
സര്‍വകലാശാലകളെ കൂടാതെ മറ്റു ഉന്നത വിദ്യാഭ്യാസ സ്ഥാപനങ്ങളും സര്‍വേയില്‍ പങ്കെടുക്കണമെന്ന് നിര്‍ദേശമുണ്ട്. സംസ്ഥാനം തിരിച്ച് വിവരം നല്‍കേണ്ട സര്‍വേയിലൂടെ വിവിധ തരം ഡിജിറ്റല്‍ സാങ്കേതിക ഉപകരണങ്ങളുടെ കണക്കാണ് ശേഖരിക്കുന്നത്. ഒരോ സ്ഥാപനത്തിലും ഉപയോഗിക്കുന്ന ഡിജിറ്റല്‍ ബോര്‍ഡുകള്‍, എല്‍.സി.ഡി പ്രൊജക്ടര്‍, ടെലിവിഷന്‍ എന്നിവയുടെ എണ്ണം കൃത്യമായി രേഖപ്പെടുത്താന്‍ നിര്‍ദേശിച്ചിട്ടുണ്ട്. പാഠ്യപ്രവര്‍ത്തനത്തിന്റെ ഭാഗമായി എത്രകാലമായി ഡിജിറ്റല്‍ സാങ്കേതിക സൗകര്യങ്ങള്‍ ഉപയോഗിക്കുന്നുവെന്നും ഇതിന്റെ ഗുണം ലഭിക്കുന്ന വിദ്യാര്‍ഥികള്‍, അധ്യാപകര്‍ എന്നിവരുടെ എണ്ണവും ഓണ്‍ലൈന്‍ സര്‍വേയില്‍ ശേഖരിക്കും.