കൊട്ടാരക്കര: 56-ാമത് കൊല്ലം ജില്ലാ സ്‌കൂള്‍ കലോത്സവത്തിന് ഇന്ന് കൊട്ടാരക്കരയില്‍ തുടക്കമാകും. 142 ഇനങ്ങളിലായി 5600 ഓളം പ്രതിഭകള്‍ മാറ്റുരക്കുന്ന കലോത്സവത്തിന്റെ രചനാമത്സരവും സംസ്‌കൃതോത്സവും അറബിക് സാഹിത്യോത്സവും ബാന്റ് മേളയും ഇന്ന് നടക്കും. 36 ഇനങ്ങളിലാണ് ഇന്ന് മത്സരങ്ങള്‍ നടക്കുന്നത്.
ഇന്നലെ 2.30 നായിരുന്നു കലോത്സവത്തില്‍ രജിസ്‌ട്രേഷന്‍ നടപടികള്‍ ആരംഭിച്ചത്. ജില്ലയിലെ 12 സബ് ജില്ലകളിലെ കലോത്സവ കണ്‍വീനര്‍മാര്‍ എത്തി രജിസ്‌ട്രേഷന്‍ നടപടികള്‍ നടത്തി. നാളെ രാവിലെ 9.30 നാണ് ഔപചാരികമായ കലോത്സവത്തിന്റെ ഉദ്ഘാടനം. കൊടിക്കുന്നില്‍ സുരേഷ് എം.പി ഉദ്ഘാടനം ചെയ്യും. അഡ്വ. ആയിഷാ പോറ്റി എം.എല്‍.എ ചടങ്ങില്‍ അധ്യക്ഷത വഹിക്കും. രാഷ്ട്രീയ സാമൂഹിക രംഗത്തെ പ്രമുഖര്‍ ചടങ്ങില്‍ പങ്കെടുക്കും.