ഡല്‍ഹി: മരട് ഫ്‌ലാറ്റ് പൊളിക്കലുമായി ബന്ധപ്പെട്ട കേസില്‍ രൂക്ഷമായ വിമര്‍ശനം കേള്‍ക്കേണ്ടി വന്നതില്‍ ഒന്നും പ്രതികരിക്കാനില്ലെന്നും സുപ്രീംകോടതിയുടെ വിധി വരട്ടെ, അതിന് ശേഷമേ പ്രതികരിക്കൂവന്നും ചീഫ് സെക്രട്ടറി ടോംജോസ്. സുപ്രീംകോടതിയുടെ ഉത്തരവ് പാലിക്കാന്‍ സര്‍ക്കാര്‍ ബാധ്യസ്ഥരാണെന്നും ചീഫ് സെക്രട്ടറി കോടതി നടപടികള്‍ പൂര്‍ത്തിയാക്കി കേരളാ ഹൗസിലെത്തിയപ്പോള്‍ പ്രതികരിച്ചു.

എന്നാല്‍ തെറ്റുതിരുത്തല്‍ ഹര്‍ജിയിലടക്കം പ്രതീക്ഷയുണ്ടെന്നാണ് ഫ്‌ലാറ്റുടമകള്‍ വ്യക്തമാക്കിയത്. പല ഫ്‌ലാറ്റുടമകളായി സുപ്രീംകോടതിയില്‍ തെറ്റുതിരുത്തല്‍ ഹര്‍ജികള്‍ നല്‍കിയിട്ടുണ്ട്. അത് സുപ്രീംകോടതി പരിഗണിക്കുമെന്ന് തന്നെയാണ് പ്രതീക്ഷയെന്ന് ഫ്‌ലാറ്റുടമകള്‍ പറയുന്നു.

ഉത്തരവ് വരട്ടെയെന്ന പ്രതികരണം മാത്രമാണ് തദ്ദേശഭരണവകുപ്പ് മന്ത്രി എ.സി മൊയ്തീന്‍ നടത്തുന്നത്. കോടതിയുടെ പരാമര്‍ശങ്ങളെല്ലാം ഉത്തരവിലുണ്ടാവണമെന്നില്ല. അതുകൊണ്ടുതന്നെ പരാമര്‍ശങ്ങളെ തല്‍ക്കാലം കണക്കിലെടുക്കുന്നില്ലെന്നും മന്ത്രി പറഞ്ഞു.

അതേസമയം, നീതിപൂര്‍വമായ ഉത്തരവ് സുപ്രീംകോടതിയുടെ ഭാഗത്തു നിന്നുണ്ടാകണമെന്ന് മന്ത്രി എം.എം മണി ആവശ്യപ്പെട്ടു.