പാലാ: പാലാ നിയമസഭാ മണ്ഡലത്തിലെ ഉപതെരഞ്ഞെടുപ്പില്‍ വോട്ടെടുപ്പ് പൂര്‍ത്തിയായി. 71.26 ശതമാനം പേരാണ് പോളിങിനെത്തിയത്. വോട്ടെടുപ്പ് ഫലം വെള്ളിയാഴ്ചയറിയാം. 

കഴിഞ്ഞവര്‍ഷത്തേക്കാളും കുറഞ്ഞ പോളിങാണ് ഇപ്രാവശ്യം. കഴിഞ്ഞ നിയമസഭാ തെരഞ്ഞെടുപ്പില്‍ 77.25 ശതമാനമായിരുന്നു പാലായിലെ പോളിങ്.

രാവിലെ കനത്ത പോളിങ് രേഖപ്പെടുത്തിയെങ്കിലും ഉച്ചയോടെ മഴ പെയ്യുകയും വോട്ടിങ് മന്ദഗതിയിലാവുകയും ചെയ്തു. രാവിലെ പത്തു മണി ആയപ്പോഴേക്കും എല്ലാ ബൂത്തുകളിലും പോളിങ് 20 ശതമാനം കഴിഞ്ഞിരുന്നു.

അക്രമസംഭവങ്ങളൊന്നും റിപ്പോര്‍ട്ട് ചെയ്തിട്ടില്ല. ആറിടത്ത് കേടുപാടിനെത്തുടര്‍ന്ന് വിവിപാറ്റ് മെഷീനുകള്‍ മാറ്റിസ്ഥാപിച്ചു. മുത്തോലി, പുലിയന്നൂര്‍ കലാനിലയം സ്‌കൂള്‍ എന്നിവിടങ്ങളില്‍ യന്ത്രത്തകരാര്‍ ഉണ്ടായതിനെത്തുടര്‍ന്ന് പോളിങ് ഒരു മണിക്കൂര്‍ നേരം നിര്‍ത്തിവച്ചിരുന്നു.