നെയ്യാറ്റിന്‍കര: കണ്‍സഷന്‍ ടിക്കറ്റ് അനുവദിക്കാത്തത് ചോദിക്കാനെത്തിയ വിദ്യാര്‍ഥികള്‍ നെയ്യാറ്റിന്‍കര കെ.എസ്.ആര്‍.ടി.സി ഡിപ്പോയിലെ എ.ടി.ഒ പള്ളിച്ചല്‍ സജീവിനെ മര്‍ദിക്കാനിടയായ സംഭവത്തില്‍ രണ്ട് പേരെ നെയ്യാറ്റിന്‍കര പൊലിസ് പിടികൂടി കോടതിയില്‍ ഹാജരാക്കി റിമാന്‍ഡ് ചെയ്തു. ധനുവച്ചപുരം ഗവ. ഐ.ടി.ഐയിലെ വിദ്യാര്‍ഥികളായ നന്ദകുമാര്‍ (19), അഭിഷേക് (19) എന്നിവരെയാണ് റിമാന്‍ഡ് ചെയ്തത്.
മര്‍ദനമേറ്റ സജീവ് നെയ്യാറ്റിന്‍കര ജനറലാശുപത്രിയില്‍ ചികിത്സ തേടിയിരുന്നു. എ.ടി.ഒയെ മര്‍ദിച്ച സംഭവത്തില്‍ നെയ്യാറ്റിന്‍കര ഡിപ്പോയിലെ ജീവനക്കാര്‍ കഴിഞ്ഞദിവസം പ്രതിഷേധ കൂട്ടായ്മ സംഘടിപ്പിച്ചിരുന്നു. ഡിപ്പോയില്‍ സ്ഥാപിച്ച സി.സി കാമറകളുടെ ഉദ്ഘാടനം കഴിഞ്ഞ ദിവസം മന്ത്രി എ.കെ ശശീന്ദ്രന്‍ ഉദ്ഘാടനം ചെയ്തു.
16 കാമറകളാണ് ഇപ്പോള്‍ സ്ഥാപിച്ചിട്ടുളളത്. കെ. ആന്‍സലന്‍ എം.എല്‍.എയുടെ പ്രദേശിക വികസന ഫണ്ടില്‍ നിന്നും 1.65 ലക്ഷം രൂപ ചിലവഴിച്ചാണ് കാമറകള്‍ സ്ഥാപിച്ചത്.