സെവിയ്യ: തുടര്‍ച്ചയായി റയലിന്റെ രക്ഷകനായി മാറി കരിം ബെന്‍സേമ. ഇന്നലെ ലാലിഗയില്‍ സൂപ്പര്‍ ടീം സെവിയ്യയ്‌ക്കെതിരേ ഗോള്‍ നേടാന്‍ മറന്ന റയലിനായി ഒടുവില്‍ ഗോള്‍ കണ്ടെത്തിയാണ് താരം വീണ്ടും രക്ഷകവേഷം കെട്ടിയത്. 1-0നായിരുന്നു ടീം ജയം. ഇതോടെ സെവിയ്യയുടെ അപരാജിത കുതിപ്പിന് കടിഞ്ഞാണിടാനും റയലിനായി. മത്സരത്തിന്റെ 64ാം മിനുട്ടിലായിരുന്നു വിജയഗോള്‍. ജയത്തോടെ റയല്‍ ലാലിഗ പട്ടികയില്‍ രണ്ടാം സ്ഥാനത്തേക്ക് കുതിച്ചു. ഗ്രൂപ്പില്‍ അഞ്ച് മത്സരങ്ങള്‍ അവസാനിച്ചപ്പോള്‍ 11 പോയിന്റുമായാണ് റയല്‍ രണ്ടാമതെത്തിയത്. ഇത്രയും മത്സരങ്ങളില്‍നിന്ന് അത്‌ലറ്റികോ ബില്‍ബാവോയ്ക്കും 11 പോയിന്റുണ്ടെങ്കിലും ശരാശരിയുടെ പിന്‍ബലത്തില്‍ അത്‌ലറ്റികോ ക്ലബ് ഒന്നാമതെത്തുകയായിരുന്നു. അതേസമയം, ജയിച്ചെങ്കില്‍ സെവിയ്യയ്ക്ക് ഒന്നാമതേക്ക് കുതിക്കാമായിരുന്നു. നിലവില്‍ 10 പോയിന്റുമായി അഞ്ചാമതാണ് ടീം. അഞ്ചു മത്സരങ്ങളില്‍ രണ്ട് വിജയം മാത്രമുള്ള ബാഴ്‌സലോണ എട്ടാം സ്ഥാനത്താണ്.
ചാംപ്യന്‍സ് ലീഗില്‍ പി.എസ്.ജിയോടേറ്റ തോല്‍വിയുമായാണ് റയല്‍ സെവിയ്യയുടെ തട്ടകത്തില്‍ ഇറങ്ങിയത്. ചാംപ്യന്‍സ് ലീഗിലെ പോരായ്മകള്‍ പരിഹരിച്ചിറങ്ങിയ റയല്‍ റാമോസിന്റെ നേതൃത്വത്തില്‍ മികച്ച പ്രതിരോധം തന്നെ തീര്‍ത്തു.
മത്സരത്തില്‍ കാര്‍വാചലിന്റേയും ബെയ്‌ലിന്റേയും നീക്കത്തിനൊടുവില്‍ ബെന്‍സെമ മികച്ചൊരു ഹെഡ്ഡറിലൂടെയാണ് റയലിനായി ലക്ഷ്യം കണ്ടത്. മറ്റു മത്സരങ്ങളില്‍ റയല്‍ സോസിഡാഡ് എസ്പാനിയോളിനേയും(3-1) അത്‌ലറ്റികോ ബില്‍ബാവോ അലാവസിനേയും(2-0) തോല്‍പിച്ചു. അതേസമയം വലന്‍സിയയും ലെഗാനെസും തമ്മിലുള്ള മത്സരം സമനിലയില്‍ പിരിഞ്ഞു.