കോഴിക്കോട്: പ്രളയബാധിത പ്രദേശത്ത് താമസിക്കുന്ന മുന്‍ തഹസില്‍ദാരുടെ പെന്‍ഷനില്‍നിന്ന് വായ്പാ തുക തിരിച്ചുപിടിക്കുന്നത് താല്‍ക്കാലികമായി നിര്‍ത്തിവയ്ക്കണമെന്ന ആവശ്യം ജില്ലാ കലക്ടര്‍ പരിഗണിച്ച് സഹായ നടപടികള്‍ സ്വീകരിക്കണമെന്ന് സംസ്ഥാന മനുഷ്യാവകാശ കമ്മിഷന്‍.
കമ്മിഷന്‍ ജ്യുഡിഷല്‍ അംഗം പി. മോഹനദാസ് കോഴിക്കോട് ജില്ലാ കലക്ടര്‍ക്കാണു നിര്‍ദേശം നല്‍കിയത്. കോഴിക്കോട് സ്വദേശി ഇ.പി രാജേന്ദ്രന്‍ നായര്‍ നല്‍കിയ പരാതിയിലാണു നടപടി.
34 വര്‍ഷം സര്‍വിസിലുണ്ടായിരുന്ന രാജേന്ദ്രന്‍ നായര്‍ക്ക് 73 വയസായി. ഇപ്പോഴും വാടകവീട്ടിലാണു താമസിക്കുന്നത്. കണ്ണൂര്‍ റോഡിലുള്ള എസ്.ബി.ഐ യില്‍ നിന്നാണു വായ്പയെടുത്തത്. 10,572 രൂപ പെന്‍ഷനില്‍നിന്ന് നേരിട്ടുപിടിക്കും. പ്രളയബാധിതനായപ്പോള്‍ വായ്പാ തുക താല്‍ക്കാലികമായി പിടിക്കരുതെന്ന് അഭ്യര്‍ഥിച്ചെങ്കിലും ബാങ്ക് സമ്മതിച്ചില്ല. പരാതിയില്‍ ഇടപെട്ട് നടപടികള്‍ സ്വീകരിച്ച ശേഷം ജില്ലാ കലക്ടര്‍ റിപ്പോര്‍ട്ട് നല്‍കണമെന്ന് കമ്മിഷന്‍ നോട്ടിസില്‍ ആവശ്യപ്പെട്ടു.