കോഴിക്കോട്: ജില്ലയില്‍ റീജ്യണല്‍ വാക്‌സിന്‍ സ്റ്റോര്‍ ആറിന് ആരോഗ്യ മന്ത്രി കെ.കെ ശൈലജ ടീച്ചര്‍ ഉദ്ഘാടനം ചെയ്യും.
ദേശീയ ആരോഗ്യ ദൗത്യം ഫണ്ടിലെ 36 ലക്ഷം രൂപ വിനിയോഗിച്ചാണ് വാക്‌സിന്‍ സ്റ്റോര്‍ നിര്‍മാണം പൂര്‍ത്തിയാക്കിയത്. ഹെല്‍ത്ത് ആന്‍ഡ് ഫാമിലി വെല്‍ഫയര്‍ ട്രെയിനിങ് സെന്റര്‍ ഓഡിറ്റോറിയത്തിന്റെ ഉദ്ഘാടനവും മന്ത്രി നിര്‍വഹിക്കും.
ജില്ലയില്‍ നടപ്പിലാക്കിയ നിപാ പ്രതിരോധ പ്രവര്‍ത്തനങ്ങള്‍ ഉള്‍ക്കൊള്ളിച്ച മാഗസിന്‍ ചടങ്ങില്‍ പ്രകാശനം ചെയ്യും. സ്റ്റാര്‍ട്ടപ്പ് മിഷന്റെ ആഭിമുഖ്യത്തില്‍ തയ്യാറാക്കിയ നിപാ സോഫ്റ്റ്‌വെയറിന്റെ ഉദ്ഘാടനം ചടങ്ങില്‍ ജില്ലാകലക്ടര്‍ യു.വി ജോസ് നിര്‍വഹിക്കും. എ. പ്രദീപ്് കുമാര്‍ എം.എല്‍.എ അധ്യക്ഷനാവും.
പരിപാടിയുടെ സ്വാഗതസംഘ രൂപികരണയോഗം ജില്ലാ മെഡിക്കല്‍ ഓഫിസറുടെ ചേംബറില്‍ നടന്നു. ഡി.എം.ഒ ഡോ. വി. ജയശ്രീ, ഡി.പി.എം ഡോ. എ. നവീന്‍, ഡോ. ലതിക, ഡോ. സരള നായര്‍, ജില്ലാ ആര്‍.സി.എച്ച് ഓഫിസര്‍, ഡോ. സുജാത തുടങ്ങിയവര്‍ പങ്കെടുത്തു.