തിരുവനന്തപുരം: ഗതാഗതക്കുറ്റങ്ങള്‍ക്ക് ഏര്‍പ്പെടുത്തിയ കനത്ത പിഴ ഇളവുചെയ്യുന്നതിന് സര്‍ക്കാര്‍ തെരഞ്ഞെടുപ്പ് കമ്മിഷന്റെ അനുമതി തേടിയേക്കും. സംസ്ഥാനത്തിന് ഇടപെടാന്‍ കഴിയുന്ന ഏഴ് ഗതാഗതക്കുറ്റങ്ങള്‍ക്കുള്ള പിഴ കുറയ്ക്കുന്നതിന് മുഖ്യമന്ത്രി പിണറായി വിജയന്റെ അധ്യക്ഷതിയില്‍ കഴിഞ്ഞ ദിവസം ചേര്‍ന്ന ഉന്നതതല യോഗം തീരുമാനിച്ചിരുന്നു. ഇതിനു ശേഷമാണ് അഞ്ച് മണ്ഡലങ്ങളില്‍ ഉപതെരഞ്ഞെടുപ്പ് പ്രഖ്യാപിച്ചുകൊണ്ടുള്ള അറിയിപ്പ് വന്നത്. ഇതോടെ പുതിയ വിജ്ഞാപനത്തിന്റെ കാര്യത്തില്‍ അനിശ്ചിതത്വമുണ്ടായിരിക്കുകയാണ്.
പിഴ ഇളവുചെയ്യുന്ന കാര്യത്തില്‍ പുതിയ വിജ്ഞാപനം തയാറാക്കുന്നതിന് ഗതാഗത സെക്രട്ടറിയെയാണ് ചുമതപ്പെടുത്തിയിരിക്കുന്നത്. ഗതാഗത കമ്മിഷണര്‍ തയാറാക്കി നല്‍കുന്ന മുറയ്ക്കായിരിക്കും സെക്രട്ടറി ഇത് സര്‍ക്കാരിനു സമര്‍പ്പിക്കുക. തുടര്‍ന്ന് പിഴ എത്രയെന്ന കാര്യം സര്‍ക്കാര്‍ തീരുമാനിച്ച് വിജ്ഞാപനം പുറപ്പെടുവിക്കും. എന്നാല്‍ ഒരു പ്രത്യേക വിഭാഗത്തെ സ്വാധീനിക്കാനല്ല, കുറ്റം ചെയ്യുന്നവര്‍ക്കുവേണ്ടി മാത്രമുള്ളതും സംസ്ഥാനത്തെയാകെ ബാധിക്കുന്നതുമായ തീരുമാനമെന്നതിനാല്‍ തെരഞ്ഞെടുപ്പ് കമ്മിഷന്റെ അനുമതി ആവശ്യമായി വരുമെന്നു തോന്നുന്നില്ല. ഇക്കാര്യം ചീഫ് സെക്രട്ടറി തലവനായ സമിതി പരിശോധിക്കും. തെരഞ്ഞെടുപ്പ് കമ്മിഷന്റെ അനുമതി ആവശ്യമാണെന്നു നിര്‍ദേശം വന്നാല്‍ തീരുമാനം കമ്മിഷന് കൈമാറുമെന്ന് ഗതാഗത വകുപ്പ് ഉന്നത വൃത്തങ്ങള്‍ പറഞ്ഞു. അല്ലെങ്കില്‍ പിഴ കുറച്ചുകൊണ്ടുള്ള തീരുമാനം രണ്ടു ദിവസത്തിനുള്ളില്‍ ഉണ്ടാകും.