ചാലക്കുടി: ദമ്പതികള്‍ സഞ്ചരിച്ചിരുന്ന കാറിന് പുറകില്‍ മറ്റൊരു കാറിടിപ്പിച്ച് അപായപ്പെടുത്താന്‍ ശ്രമിച്ച കേസില്‍ യുവാവ് അറസ്റ്റില്‍.
അത്താണി ചെങ്ങമനാട് ആലുക്കല്‍ വീട്ടില്‍ പ്രിന്‍സ്(26)ആണ് അറസ്റ്റിലായത്. അങ്കമാലിയിലെ പെട്രോള്‍ പമ്പ് ഉടമയും ചാലക്കുടി സ്വദേശിയുമായ അനൂപ് വര്‍ഗീസും ഭാര്യയും സഞ്ചരിച്ചിരുന്ന കാറിന് പുറകിലാണ് ഇടിച്ചത്. ഇക്കഴിഞ്ഞ 28ന് രാത്രി 10നായിരുന്നു സംഭവം. വിവാഹചടങ്ങില്‍ പങ്കെടുത്ത് ചാലക്കുടിയിലേക്ക് വരുന്ന വഴിയായിരുന്നു സംഭവം. മുരിങ്ങൂര്‍ പള്ളിക്ക് സമീപത്ത് വച്ച് ദമ്പതികള്‍ സഞ്ചരിച്ചിരുന്ന കാറിന് പുറകില്‍ കാറിടിപ്പിച്ചു. കാറിനെ പിന്തുടര്‍ന്ന് ഡിവൈന്‍ മേല്‍പാലത്തിന് മുകളില്‍ വീണ്ടും പുറകില്‍ ഇടിപ്പിച്ചു. തുടര്‍ന്ന് ഡിവൈനിലേക്ക് രക്ഷപ്പെടാന്‍ ശ്രമിച്ച ദമ്പതികളെ ഡിവൈന്റെ പ്രധാന കവാടത്തിന് മുന്നില്‍ വച്ച് വീണ്ടു ഇടിപ്പിക്കുകയും കാറില്‍ നിന്ന് ഇറങ്ങി വന്ന അക്രമി ഇവരുടെ കാറിന്റെ ബോണറ്റില്‍ ഇടിച്ച് തിരികെ പോവുകയായിരുന്നു. തുടര്‍ന്ന് പൊലിസില്‍ നല്‍കിയ പരാതിയെ തുടര്‍ന്നാണ് പ്രതിയെ കൊരട്ടി പൊലിസ് അറസ്റ്റ് ചെയ്തത്. അങ്കമാലിക്ക് സമീപം വച്ച് പ്രതി സഞ്ചരിച്ചിരുന്ന ബൈക്കില്‍ ദമ്പതികളുടെ കാര്‍ തട്ടിയെന്നും ഇതിലുള്ള ദേഷ്യത്തിലാണ് പ്രതി മറ്റൊരു കാറിലെത്തി ഇവരെ ആക്രമിച്ചതിന് പിന്നിലെന്നും പൊലിസ് പറഞ്ഞു.