കണ്ണൂര്‍: തലശ്ശേരി കൂത്തുപറമ്പ് മേഖലകളില്‍ വന്‍തോതില്‍ ലഹരി മരുന്ന് കച്ചവടം നടത്തുന്ന യുവാവിനെ ബ്രൗണ്‍ ഷുഗറുമായി എക്‌സൈസ് സംഘം പിടികൂടി. കൂത്തുപറമ്പ് പുറക്കളത്തുള്ള കോന്തോത്ത് വീട്ടില്‍ കെ. നവാസി (37) നെയാണ് 23 ഗ്രാം ബ്രൗണ്‍ഷുഗറുമായി കണ്ണൂര്‍ എക്‌സൈസ് നാര്‍കോട്ടിക് സ്‌പെഷല്‍ സ്‌ക്വാഡ് സര്‍ക്കിള്‍ ഇന്‍സ്‌പെക്ടര്‍ സതീഷ് കുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.
പിടികൂടിയ ബ്രൗണ്‍ ഷുഗറിന് അന്താരാഷ്ട്ര മാര്‍ക്കറ്റില്‍ ഏകദേശം ആറ് ലക്ഷത്തോളം വിലവരും. കണ്ണൂരിലെ പ്രധാന നഗരങ്ങളിലെല്ലാം ഇയാള്‍ക്ക് നിരവധി ഏജന്റുമാരുമുണ്ട്. ഓരോ ആഴ്ചയും മുംബൈയില്‍ പോയി ബംഗളൂരുവഴിയാണ് ഇയാള്‍ കണ്ണൂരിലേക്ക് ലഹരി കടത്തുന്നത്. വന്‍ലാഭം ലഭിച്ചതിലൂടെ ലക്ഷങ്ങളുടെ ആസ്തിയാണ് ഇയാള്‍ ചെറിയ വര്‍ഷം കൊണ്ട് നേടിയെടുത്തത്. ഇയാള്‍ക്കെതിരേ മുന്‍പും നിരവധി നാര്‍കോട്ടിക്ക് കേസുകള്‍ രജിസ്റ്റര്‍ ചെയ്തിട്ടുണ്ടെങ്കിലും ഇത്രയധികം ലഹരി വസ്തുക്കളായി ആദ്യമായാണ് പിടിയിലാവുന്നത്. ഉത്തര മേഖല ജോയന്റ് എക്‌സൈസ് കമ്മിഷണര്‍ ഡി. സന്തോഷിന്റെ നേതൃത്വത്തിലുള്ള സ്‌പെഷല്‍ സ്‌ക്വാഡിന് ലഭിച്ച വിവരത്തെ തുടര്‍ന്ന് രണ്ടര മാസത്തോളമായി ഇയാള്‍ എക്‌സൈസിന്റെ രഹസ്യ നിരീക്ഷണത്തിലായിരുന്നു.
ബ്രൗണ്‍ ഷുഗര്‍ കടത്തിക്കൊണ്ടു വരുന്നതിനിടെയാണ് ഇയാളെ പിടികൂടിയത്. ഇയാളെ വിശദമായി ചോദ്യം ചെയ്തതിലൂടെ തലശ്ശേരിയിലെയും മറ്റ് ഭാഗങ്ങളിലെയും ചെറുകിട ഏജന്റുമാരെ കുറിച്ച് എക്‌സൈസിന് കൂടുതല്‍ വിവരം ലഭിച്ചിട്ടുണ്ട്.