തൊടുപുഴ: ദേശീയ ക്ലാസിക് പവര്‍ലിഫ്റ്റിങ് ചാംപ്യന്‍ഷിപ്പ് നാളെ മുതല്‍ 30 വരെ മുരിക്കാശേരി പാവനാത്മ കോളജ് ഇന്‍ഡോര്‍ സ്റ്റേഡിയത്തില്‍ നടക്കും. ആദ്യമായാണ് ഇടുക്കി ജില്ല ദേശീയ പവര്‍ലിഫ്റ്റിങ് ചാംപ്യന്‍ഷിപ്പിന് വേദിയാകുന്നത്. രാജ്യത്തെ സബ് ജൂനിയര്‍, ജൂനിയര്‍, സീനിയര്‍, മാസ്റ്റേഴ്‌സ് എന്നീ വിഭാഗങ്ങളിലായി 800ലധികം പുരുഷ- വനിതാ താരങ്ങള്‍ മത്സരിക്കും. വിജയികളാകുന്നവര്‍ ഡിസംബറില്‍ കസാകിസ്താനില്‍ നടക്കുന്ന ഏഷ്യന്‍ പവര്‍ലിഫ്റ്റിങ് ചാംപ്യന്‍ഷിപ്പില്‍ ഇന്ത്യയെ പ്രതിനിധീകരിക്കും.
നാളെ 20,000 പേര്‍ പങ്കെടുക്കുന്ന വര്‍ണാഭമായ വിളംബര ജാഥയില്‍ വിവിധ സംസ്ഥാനങ്ങളില്‍ നിന്നുള്ള കായിക താരങ്ങള്‍, വിവിധ സംസ്ഥാനങ്ങളുടെ പ്ലോട്ടുകള്‍, കേരളത്തിന്റെ തനതു കലാരൂപങ്ങള്‍ അണിനിരക്കും. കായികമന്ത്രി ഇ.പി ജയരാജന്‍ ഉദ്ഘാടനം നിര്‍വഹിക്കും.