ലണ്ടന്‍: പട്ടേല്‍ പ്രതിമാ വിവാദം രാജ്യത്തിനു പുറത്തേക്കും വ്യാപിക്കുന്നു. ശക്തമായ വിമര്‍ശനമാണ് ബ്രിട്ടണില്‍ നിന്ന് ഉയര്‍ന്നുവരുന്നത്. തങ്ങളില്‍ സഹായം സ്വീകരിച്ച് ഇന്ത്യ ധൂര്‍ത്തടിക്കുകയാണെന്ന് ബ്രിട്ടീഷ് മാധ്യമങ്ങളും എം.പിമാരും രംഗത്തെത്തി.

ദ ഡൈലി മെയിലില്‍ പ്രസിദ്ധീകരിച്ച ലേഖനത്തില്‍ ഇന്ത്യയെ കടുത്ത രീതിയിലാണ് വിമര്‍ശിക്കുന്നത്. യു.കെ തങ്ങളുടെ നികുതിയില്‍ നിന്ന് 1.17 ബില്യണ്‍ പൗണ്ട് ഇന്ത്യയ്ക്ക് നല്‍കുമ്പോള്‍, ഇന്ത്യ ഏകതാ പ്രതിമയ്ക്കു വേണ്ടി 330 മില്യണ്‍ പൊടിച്ചുകളഞ്ഞുവെന്നാണ് ലേഖനത്തില്‍ പറയുന്നത്.

സ്ത്രീ ശാക്തീകരണം, വിദ്യാഭ്യാസം തുടങ്ങിയ ആവശ്യങ്ങള്‍ക്കാണ് ബ്രിട്ടണ്‍ സഹായം നല്‍കിയതെന്ന് ലേഖനത്തില്‍ പറയുന്നു.
പ്രതിമയ്ക്കു വേണ്ടി തറക്കല്ലിട്ട 2012 ല്‍ യു.കെ ഇന്ത്യയ്ക്കായി 300 മില്യണിന്റെ സഹായം നല്‍കി. 2013 ല്‍ 268 മില്യണ്‍ പൗണ്ടും 2014 ല്‍ 278 മില്യണ്‍ പൗണ്ടും 2015 ല്‍ 185 മില്യണ്‍ പൗണ്ടും നല്‍കി.

ടോറി എം.പി പീറ്റര്‍ ബോണും ഇക്കാര്യം ആരോപിച്ചിട്ടുണ്ട്. ഇത്തരത്തിലൊരു പ്രതിമ നിര്‍മിക്കാന്‍ ശേഷിയുള്ള ഇന്ത്യയ്ക്ക് ഇനി യു.കെ പണം നല്‍കേണ്ടതില്ലെന്നാണ് ഇതു സൂചിപ്പിക്കുന്നതെന്ന് എം.പി പറഞ്ഞു.