സിഡ്‌നി: ആസ്‌ത്രേലിയന്‍ പ്രധാനമന്ത്രി മാല്‍കം ടേണ്‍ബുള്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെ പരിഹസിക്കുന്ന ഓഡിയോ പുറത്ത്. ട്രംപിനെ അനുകരിച്ചും എടുത്തുദ്ധരിച്ചുമാണ് ടേണ്‍ബുളിന്റെ പരിഹാസം.
ബുധനാഴ്ച പാര്‍ലമെന്റ് ഹൗസില്‍ നടന്ന രഹസ്യ മാധ്യമയോഗത്തില്‍ ടേണ്‍ബുള്‍ നടത്തിയ പ്രസംഗമാണ് ചോര്‍ന്നത്. ട്രംപിന്റെ അംഗവിക്ഷേപങ്ങളും ചലനങ്ങളും വാക്പ്രയോഗങ്ങളും അപ്പടി അനുകരിച്ചായിരുന്നു പ്രസംഗം. ആസ്‌ത്രേലിയന്‍ വാര്‍ത്താ ചാനലായ 'നയന്‍ നെറ്റ്‌വര്‍ക്ക് ന്യൂസാ'ണ് ഓഡിയോ ക്ലിപ് പുറത്തുവിട്ടത്.
കഴിഞ്ഞ മാസം ന്യൂയോര്‍ക്കില്‍ നടന്ന ട്രംപുമായുള്ള കൂടിക്കാഴ്ച സൂചിപ്പിച്ചാണ് പ്രസംഗം തുടങ്ങുന്നത്. രണ്ടുപേരുടെയും തെരഞ്ഞെടുപ്പ് വിജയത്തെ താരതമ്യം ചെയ്ത ടേണ്‍ബുള്‍ അമേരിക്കന്‍ പ്രസിഡന്റ് തെരഞ്ഞെടുപ്പിലെ റഷ്യന്‍ സഹായത്തെ കുറിച്ചും പരിഹസിക്കുന്നുണ്ട്. 'ഈ റഷ്യക്കാരനെ എനിക്കറിയാം...സംഗതി സത്യമാണ്. എന്നെ വിശ്വസിക്കൂ'വെന്നായിരുന്നു തമാശരൂപത്തില്‍ ടേണ്‍ബുള്‍ ട്രംപിനിട്ട് കുത്തിയത്.
അധികാരമേറ്റ ഉടന്‍ നടത്തിയ ഫോണ്‍ സംഭാഷണത്തില്‍ മുന്‍ പ്രസിഡന്റ് ഒബാമയും ടേണ്‍ബുളും ചേര്‍ന്നു തയാറാക്കിയ അഭയാര്‍ഥി കരാറുകളെ ട്രംപ് രൂക്ഷമായി വിമര്‍ശിച്ചിരുന്നു.