ഗുരുവായൂര്‍: തീര്‍ഥാടക നഗരിയായ ഗുരുവായൂരില്‍ ഇനി സംഗീതത്തിന്റെ രാപ്പകലുകള്‍. ഏകാദശിയോടനുബന്ധിച്ച് 15 ദിവസം നീണ്ടു നില്‍ക്കുന്ന പ്രസിദ്ധമായ ചെമ്പൈ സംഗീതോത്സവത്തിന് ഇന്നലെ മേല്‍പ്പത്തൂര്‍ ഓഡിറ്റോറിയത്തില്‍ തുടക്കമായി.
സംഗീതോത്സവം ദേവസ്വം മന്ത്രി കടകംപള്ളി സുരേന്ദ്രന്‍ ഉദ്ഘാടനം ചെയ്തു. ദേവസ്വം ചെയര്‍മാന്‍ അഡ്വ. കെ.ബി മോഹന്‍ദാസ് അധ്യക്ഷനായി. ശ്രീ ഗുരുവായൂരപ്പന്‍ ചെമ്പൈ പുരസ്‌കാര ജേതാവ് പാല സി.കെ രാമചന്ദ്രന്‍ ഉദ്ഘാടന കച്ചേരി അവതരിപ്പിച്ചു. തിരുവിഴ ശിവാനന്ദന്‍ (വയലിന്‍), കൊച്ചിന്‍ ബാലകൃഷ്ണ കമ്മത്ത്(മൃദംഗം), തിരുവനന്തപുരം വി. ദീപു ഏലംകുളം (ഘടം) എന്നിവര്‍ പക്കമേളം ഒരുക്കി.
ഇന്ന് രാവിലെ ഓഡിറ്റോറിയത്തില്‍ ഗുരുവായൂരപ്പന്റെ ഛായാചിത്രത്തിനു മുന്നിലെ നിലവിളക്കില്‍ ദീപം പകരുന്നതോടെയാണ് സംഗീതാര്‍ച്ചനയ്ക്ക് തുടക്കമാവുക.