തൃക്കരിപ്പൂര്‍: പടന്നക്കടപ്പുറം ഗവ. ഫിഷറിസ് ഹയര്‍സെക്കന്‍ഡറി സ്‌കൂളില്‍ നടന്ന കിക്കോഫ് സെലക്ഷന്‍ ശ്രദ്ധേയമായി. ഓണ്‍ലൈനിലും നേരിട്ടുമായി 432 കുട്ടികള്‍ രജിസ്‌ട്രേഷന്‍ നടത്തി. 287 കുട്ടികള്‍ സെലക്ഷനില്‍ സംബന്ധിച്ചു. ഇന്നലെ രാവിലെ ഏഴിനു തുടങ്ങിയ സെലക്ഷന്‍ 11.30ന് അവസാനിച്ചു.
പ്രൈമറി സെലക്ഷനില്‍നിന്നു തിരഞ്ഞെടുക്കുന്ന 50 കുട്ടികള്‍ക്ക് നാലുദിവസത്തെ പ്രാരംഭ പരിശീലനത്തിനു ശേഷം 25 കുട്ടികളെ തെരഞ്ഞെടുത്ത് നവംബര്‍ അവസാനത്തോടെ പരിശീലനം ആരംഭിക്കും.
പരിശീലനത്തില്‍ പങ്കെടുക്കുന്ന കുട്ടികള്‍ക്ക് സ്‌പോര്‍ട്‌സ് കിറ്റ്, ലഘുഭക്ഷണം എന്നിവ സൗജന്യമായി നല്‍കും. സംസ്ഥാന കായിക വകുപ്പിന്റെ പദ്ധതിയിലുള്‍പ്പെടുത്തിയാണ് പദ്ധതി.
തൃക്കരിപ്പൂര്‍ മണ്ഡലത്തിലെ പദ്ധതിക്കാണ് ഇന്നലെ പടന്നക്കടപ്പുറം ഗവ. ഫിഷറീസ് ഹയര്‍സെക്കന്‍ഡറി സ്‌കൂളില്‍ തുടക്കമായത്. പ്രോജക്ട് കോര്‍ഡിനേറ്റര്‍ യു.വി ബാബുരാജ്, സെന്റര്‍ കോര്‍ഡിനേറ്റര്‍ റെനി ജേക്കബ്, സ്‌കൂള്‍ പ്രധാന അധ്യാപകന്‍ വി. സുധാകരന്‍, കായികാധ്യാപകന്‍ കെ.വി ബിജു, ഗ്രാമപഞ്ചായത്ത് പ്രസിഡന്റ് എം.ടി അബ്ദുല്‍ ജബ്ബാര്‍, പി.ടി.എ പ്രസിഡന്റ് എന്‍. കെ മുഹമ്മദ്കുഞ്ഞി, പരിശീലകന്‍ കെ നിഷാന്ത്കുമാര്‍, ആസിഫ് കോട്ടയില്‍, ഷെരീഫ് മാടാപ്പുറം, എ.വി ഗണേശന്‍ എന്നിവര്‍ നേതൃത്വം നല്‍കി.