കൂത്തുപറമ്പ്: കോട്ടയം പൊയിലിനടുത്ത് കുന്നിനു മീത്തലില്‍ സ്വകാര്യ ബസ് കാറിലിടിച്ച് കാര്‍ യാത്രക്കാരായ സ്ത്രീക്കും കുട്ടിക്കും പരുക്കേറ്റു.
ഇന്നലെ വൈകുന്നേരം അഞ്ചുമണിയോടെയാണ് അപകടം. റോഡരികില്‍ നിര്‍ത്തിയിട്ടിരുന്ന കാറില്‍ കൂത്തുപറമ്പ് ഭാഗത്ത് നിന്നും തലശ്ശേരിയിലേക്ക് പോവുകയായിരുന്ന കോസ്‌മോസ് ബസിടിക്കുകയായിരുന്നു.
ഇടിയുടെ ആഘാതത്തില്‍ കുറേ ദൂരം പിന്നോട്ടേക്ക് നീങ്ങിയ കാര്‍ റോഡരികില്‍ നിര്‍ത്തിയിട്ട മറ്റൊരു സ്‌കൂട്ടറിലും ഇടിച്ചു. പരുക്കേറ്റവരെ കൂത്തുപറമ്പ് താലൂക്കാശുപത്രിയില്‍ പ്രവേശിപ്പിച്ചു.
അപകടമുണ്ടാക്കിയ ബസ് കതിരൂര്‍ പൊലിസ് കസ്റ്റഡിയിലെടുത്തു. ബസുകളുടെ അമിതവേഗമാണ് അപകടങ്ങള്‍ക്കിടയാക്കുന്നതെന്നാരോപിച്ച് തത്സമയം അമിതവേഗതയില്‍ എത്തിയ മറ്റൊരു സ്വകാര്യ ബസിനെ ഒരു സംഘം നാട്ടുകാര്‍ തടഞ്ഞുവെച്ചെങ്കിലും പിന്നീട് വിട്ടയച്ചു.