മട്ടന്നൂര്‍: കണ്ണൂര്‍ രാജ്യാന്തര വിമാനത്താവളത്തില്‍ യാത്രക്കാരിയില്‍നിന്ന് സ്വര്‍ണം പിടികൂടി. വടകര സ്വദേശിനി ഷരീഫയില്‍ നിന്നാണ് 233 ഗ്രാം സ്വര്‍ണം പിടികൂടിയത്. ദോഹയില്‍നിന്ന് ഇന്നലെ പുലര്‍ച്ചെ 5.40ന് എത്തിയ ഇന്‍ഡിഗോ വിമാനത്തിലെ യാത്രക്കാരിയായിരുന്നു ഷരീഫ. സംശയം തോന്നിയതിനെ തുടര്‍ന്ന് കസ്റ്റംസ് അസി. കമ്മിഷണര്‍ ഒ. പ്രദീപിന്റെ നേതൃത്വത്തിലുള്ള സംഘം നടത്തിയ പരിശോധനയിലാണ് രണ്ട് മാല കണ്ടെടുത്തത്.
കഴിഞ്ഞമാസം ഡി.ആര്‍.ഐയുടെ നേതൃത്വത്തില്‍ നടത്തിയ പരിശോധനയില്‍ ഒരു ദിവസം നാലരക്കോടിയുടെ സ്വര്‍ണം യാത്രക്കാരില്‍നിന്ന് പിടികൂടിയിരുന്നു. സ്വര്‍ണക്കടത്തിനു ഒത്താശ ചെയ്ത കണ്ണൂര്‍ വിമാനത്താവളത്തിലെ കസ്റ്റംസ് ഉദ്യോഗസ്ഥനെയും ഡി.ആര്‍.ഐ അറസ്റ്റ് ചെയ്തിരുന്നു. വിദേശത്തേക്കു കടത്താന്‍ ശ്രമിച്ച വിദേശ കറന്‍സിയും ബുധനാഴ്ച രാത്രി വിമാനത്താവളത്തില്‍നിന്ന് പിടികൂടി. മലപ്പുറം അരീക്കോട് സ്വദേശി ശിഹാബുദ്ദീനില്‍ നിന്നാണ് നാലര ലക്ഷത്തോളം രൂപയുടെ കറന്‍സി പിടിച്ചെടുത്തത്.