തൃശൂര്‍: കേരള കര്‍ഷകക്ഷേമവകുപ്പിന്റെ നേതൃത്വത്തില്‍ ഫാം ഇന്‍ഫര്‍മേഷന്‍ ബ്യൂറോ മാധ്യമപ്രവര്‍ത്തകര്‍ക്കും കൃഷി-മൃഗസംരക്ഷണ -ക്ഷീരവികസന വകുപ്പുകളിലെ തെരഞ്ഞെടുക്കപ്പെട്ട ഉദ്യോഗസ്ഥര്‍ക്കുമായി സംഘടിപ്പിക്കുന്ന കാര്‍ഷികരംഗം ശില്‍പശാല ഇന്നു മുതല്‍ ഓഗസ്റ്റ് ഏഴുവരെ പീച്ചി കേരള ഫോറസ്റ്റ് റിസര്‍ച്ച് ഇന്‍സ്റ്റിറ്റ്യൂട്ടില്‍ നടത്തും. കേദാരം എന്നു പേരിട്ട ശില്‍പശാല വെള്ളിയാഴ്ച ഉച്ചക്ക് 1.30 ന് കൃഷിമന്ത്രി വി.എസ്. സുനില്‍കുമാര്‍ ഉദ്ഘാടനം ചെയ്യും. കെ.രാജന്‍ എം.എല്‍.എ അധ്യക്ഷത വഹിക്കുന്ന ചടങ്ങില്‍ കാര്‍ഷികവകുപ്പ് സെക്രട്ടറി ഡോ. രാജു നാരായണസ്വാമി ആമുഖപ്രഭാഷണം നടത്തും.

ജില്ലാ പഞ്ചായത്ത് പ്രസിഡണ്ട് ഷീല വിജയകുമാര്‍, ജനപ്രതിനിധികള്‍, കേരള കാര്‍ഷിക സര്‍വകലാശാല വൈസ് ചാന്‍സലര്‍ ഡോ. പി.രാജേന്ദ്രന്‍, കെ.എഫ്.ആര്‍.ഐ ഡയറക്ടര്‍ ഡോ. ജോര്‍ജ് വര്‍ഗീസ് തുടങ്ങിയവര്‍ സംബന്ധിക്കും.
ഇന്നു രാവിലെ ഒന്‍പതിന് രജിസ്‌ട്രേഷന്‍ തുടങ്ങും. 10ന് 'കൃഷി എഴുത്തിന്റെ രീതിശാസ്ത്രം' എന്ന വിഷയത്തില്‍ സെമിനാര്‍ നടത്തും. രാധാകൃഷ്ണന്‍ നരിപ്പറ്റ മോഡറേറ്റര്‍ ആകും. നാളെ 'കേരളം ജൈവകൃഷിയിലേക്ക്' എന്ന വിഷയത്തില്‍ പ്രമുഖ എഴുത്തുകാരന്‍ സി. രാധാകൃഷ്ണന്‍ മുഖ്യപ്രഭാഷണം നടത്തും. വൈകിട്ട് മധുമധുരം-ധനമധുരം വിഷയത്തില്‍ കാര്‍ഷിക സര്‍വകലാശാല എന്റമോളജി വിഭാഗം പ്രൊഫസര്‍ ഡോ. മണി ചെല്ലപ്പന്‍, എം.ആര്‍. സജയകുമാര്‍ എന്നിവര്‍ സംബന്ധിക്കും.

ഏഴിന് പഠനയാത്ര സംബന്ധമായി മാധ്യമപ്രതിനിധികള്‍ തയ്യാറാക്കിയ ഫീച്ചറുകള്‍ അവതരിപ്പിക്കും. ചീഫ് അഗ്രി. സ്റ്റേറ്റ് പ്ലാനിങ് ബോര്‍ഡ് അംഗം ഡോ. പി.രാജശേഖരന്‍ മുഖ്യാതിഥിയാകും. തുടര്‍ന്ന് വിവിധ വിഷയങ്ങളില്‍ സെമിനാറുകള്‍ നടത്തും. പ്രൊഫസര്‍മാരായ ഡോ. രഞ്ചന്‍ എസ്. കരിപ്പായി, ഡോ. കെ.ബി.ഷീല, അഡീ. പ്രൊഫസര്‍ ഡോ. സജി ഗോമസ്, ഫാം ജേണലിസ്റ്റ് ഡോ. പി.വി. മോഹനന്‍ എന്നിവര്‍ സംബന്ധിക്കും. എല്ലാ ദിവസവും വൈകിട്ട് കലാസന്ധ്യ അരങ്ങേറും.