പേരാമ്പ്ര: സര്‍ക്കാറിന്റെ ആര്‍ദ്രം പദ്ധതിയില്‍ പെടുത്തി കുടുംബാരോഗ്യ കേന്ദ്രങ്ങളാക്കിയ പേരാമ്പ്ര നിയോജക മണ്ഡലത്തിലെ അരിക്കുളം, നൊച്ചാട് പ്രൈമറി ഹെല്‍ത്ത് സെന്ററുകളില്‍ ഡോക്ടറും അത്യാവശ്യത്തിന് മരുന്നുമില്ലാതെ രോഗികള്‍ വലയുന്നു. സര്‍ക്കാര്‍ പ്രൈമറി ഹെല്‍ത്ത് സെന്ററുകളെ കുടുംബാരോഗ്യ കേന്ദ്രങ്ങളാക്കി മാറ്റി മെച്ചപ്പെട്ട ചികിത്സക്കൊപ്പം അതത് ആശുപത്രി പരിധിയില്‍പെടുന്ന പ്രദേശത്തെ കുടുംബങ്ങളുടെ വിവരശേഖരണവും മുഴുവന്‍ സമയ ഡോക്ടറുടെ സേവനവും മരുന്നും ലഭ്യമാക്കുന്നതാണ് പദ്ധതി.
അതത് പ്രദേശങ്ങളിലെ രോഗികള്‍ക്ക് വിദഗ്ധ ചികിത്സ നല്‍കുന്നതോടൊപ്പം രോഗപ്രതിരോധ പ്രവര്‍ത്തനങ്ങളും കുടുംബാരോഗ്യ കേന്ദ്രങ്ങള്‍ വഴി സാധാരണക്കാര്‍ക്ക് ലഭ്യമാക്കുമെന്നാണ് കേന്ദ്രങ്ങളുടെ പ്രഖ്യാപന ചടങ്ങില്‍ മന്ത്രി സൂചിപ്പിച്ചത്.
എന്നാല്‍ പ്രഖ്യാപനങ്ങള്‍ കഴിഞ്ഞ് മാസങ്ങള്‍ കഴിഞ്ഞിട്ടും പ്രൈമറി ഹെല്‍ത്ത് സെന്ററുകളില്‍ ഡോക്ടറെ നിയമിക്കാനോ അത്യാവശ്യത്തിന് മരുന്ന് ലഭ്യമാക്കുന്നതിനോ നടപടിയുണ്ടായിട്ടില്ല.
നൊച്ചാട് പ്രൈമറി ഹെല്‍ത്ത് സെന്ററില്‍ ഏറെ ബഹളമയത്തോടെ നടത്തിയ പ്രഖ്യാപന ഉദ്ഘാടന മാമാങ്കത്തില്‍ സ്ഥിരം ഡോക്ടറെ നിയമിക്കുന്നതിന് ആരോഗ്യ വകുപ്പുമായി ആലോചിച്ച് ഉടനെ നടപടിയുണ്ടാവുമെന്ന് അറിയിച്ചിരുന്നു.
എന്നാല്‍ നേരത്തെയുളള ആഴ്ചയില്‍ രണ്ട് ദിവസം ഉണ്ടായിരുന്ന ഡോക്ടറുടെ സേവനം ഒരു ദിവസമായും തീരെ ഇല്ലാതെയും ആയ സ്ഥിതിയാണുളളത്.
നൊച്ചാട് പ്രൈമറി ഹെല്‍ത്ത് സെന്ററില്‍ അയല്‍പഞ്ചായത്തുകളായ കോട്ടൂര്‍, കായണ്ണ, പേരാമ്പ്രഭാഗങ്ങളില്‍ നിന്ന് നൂറ് കണക്കിന് രോഗികള്‍ ചികിത്സ തേടി വരുന്നുണ്ട്. എന്നാല്‍ ഡോക്ടര്‍ ഇല്ലാതെ പല ദിവസവും തിരിച്ചു പോകേണ്ട അവസ്ഥയാണുളളത്. ബുധനാഴ്ച ദിവസം മാത്രമാണ് പോളിയോ കൂടി ഉളളത് കൊണ്ട് ഡോക്ടര്‍ എത്തുന്നത്.
പനി ബാധിതരും മറ്റ് രോഗികളും ഏറെ പ്രയാസപ്പെട്ട് ഇവിടെ എത്തി തിരിച്ചു പോകുന്ന അവസ്ഥ നിത്യസംഭവമാണ്.
അരിക്കുളം പ്രൈമറി ഹെല്‍ത്ത് സെന്ററിലും സമാനമായ രീതിയിലാണ് കാര്യങ്ങള്‍ എന്ന് പരാതി ഉയരുന്നു. ഇവിടങ്ങളിലെ ആശുപത്രി വികസന സമിതികളും നോക്കുകുത്തികളാണെന്ന് നാട്ടുകാര്‍ പരാതിപ്പെടുന്നു.