തിരുവനന്തപുരം: പാലാ ഉപതെരഞ്ഞെടുപ്പില്‍ കേരള കോണ്‍ഗ്രസ് പ്രതിനിധി തോറ്റതോടെ നിയമസഭയില്‍ കരുത്തനായി പി.ജെ ജോസഫ്. ടോം ജോസ് പാലായില്‍ പരാജയപ്പെട്ടതോടെ ജോസ് കെ.മാണി വിഭാഗം എം.എല്‍.എമാരുടെ എണ്ണം രണ്ടായി ചുരുങ്ങി.
അതേസമയം, ജോസഫ് വിഭാഗത്തിന് മൂന്ന് എം.എല്‍.എമാരാണുള്ളത്. അഞ്ച് എം.എല്‍.എമാരാണ് കേരള കോണ്‍ഗ്രസ് എമ്മിന് ആകെയുള്ളത്. ഇതില്‍ പി.ജെ ജോസഫിനെ കൂടാതെ കടുത്തുരുത്തി എം.എല്‍.എ മോന്‍സ് ജോസഫ്, ചങ്ങനാശേരി എം.എല്‍.എ സി.എഫ് തോമസ് എന്നിവര്‍ ജോസഫ് പക്ഷത്താണ്. റോഷി അഗസ്റ്റിന്‍, എന്‍. ജയരാജ് എന്നിവരാണ് ജോസ് കെ. മാണിക്കൊപ്പമുള്ളത്.
കെ.എം മാണിയുടെ മരണത്തിനു പിന്നാലെ ജോസ് കെ.മാണി പാര്‍ട്ടിയില്‍ പിടിമുറുക്കിയതാണ് ജോസഫ് പക്ഷത്തേക്ക് ചായാന്‍ സി.എഫ് തോമസിനെ പ്രേരിപ്പിച്ചത്. നിയമസഭാ കക്ഷിനേതാവായി ജോസഫിനെ പ്രഖ്യാപിക്കണമെന്ന് ആവശ്യപ്പെട്ട് മോന്‍സ് ജോസഫ് സ്പീക്കര്‍ക്ക് കത്ത് നല്‍കിയിരുന്നു. എതിര്‍പ്പ് അറിയിച്ച് ജോസ് വിഭാഗത്തിലെ റോഷി അഗസ്റ്റിനും സ്പീക്കര്‍ക്ക് മുന്നിലെത്തി. അടുത്ത നിയമസഭാ സമ്മേളനത്തില്‍ തീരുമാനം അറിയിക്കാനാണ് സ്പീക്കര്‍ നിര്‍ദേശിച്ചിരിക്കുന്നത്. അതുവരെ മാണിയുടെ സീറ്റ് ജോസഫിന് അനുവദിച്ചു നല്‍കുകയും ചെയ്തിരുന്നു. അടുത്ത നിയമസഭാ സമ്മേളനത്തില്‍ പാര്‍ട്ടിയുടെ നിലപാട് സ്വീകരിക്കുന്നത് ജോസഫായിരിക്കുമെന്നതില്‍ തര്‍ക്കമില്ല.