കൊടുവായൂര്‍: വിദ്യാര്‍ഥിസംഘടനകള്‍ തമ്മിലുണ്ടായ സംഘട്ടനം പാര്‍ട്ടികള്‍ ഏറ്റെടുത്ത് ഏറ്റുമുട്ടലിലെത്തിയതോടെ കൊടുവായൂര്‍ ടൗണില്‍ സംഘര്‍ഷാവസ്ഥ. എസ്.എഫ്.ഐ-എ.ബി.വി.പി വിദ്യാര്‍ഥി സംഘടനകളാണ് ഇന്നലെ കൊടുവായൂര്‍ സ്‌കൂളില്‍ അടിപിടിയുണ്ടായത്. വിവരമറിഞ്ഞ് സി.പി.എം-ബി.ജെ.പി പ്രവര്‍ത്തകര്‍ വിദ്യാര്‍ഥി സംഘടനകളെ അനുകൂലിച്ച് രംഗത്തെത്തിയതോടെ കൊടുവായൂര്‍ സി.പി.എം ഓഫിസിന് മുന്നില്‍ സംഘട്ടനമുണ്ടായി. ആറുപേര്‍ക്ക് പരിക്കേറ്റു.
സംഭവത്തെ തുടര്‍ന്ന് എസ്.പിയുടെ നേതൃത്വത്തില്‍ ടൗണില്‍ പൊലിസിനെ വിന്യസിച്ചു. ഇരുകൂട്ടരും രണ്ടുസ്ഥലങ്ങളിലായി നില്‍ക്കുന്നതിനാല്‍ സംഘര്‍ഷാവസ്ഥയിലാണ് ടൗണ്‍. ടൗണിലൂടെവരുന്ന വാഹനങ്ങള്‍ അക്രമം ഭയന്ന് വഴിമാറി സഞ്ചരിക്കുകയാണ്. ഇരുപാര്‍ട്ടി നേതാക്കളുമായി ചര്‍ച്ച നടത്തി പ്രശ്‌നത്തിനു പരിഹാരം കാണാനുള്ള പൊലിസ് ശ്രമം തുടരുകയാണ്.
അക്രമസംഭവങ്ങളെ തുടര്‍ന്ന് ടൗണിലെ വ്യാപാരസ്ഥാപനങ്ങളും നേരത്തെ അടച്ചിട്ടു.