ഒത്താവ: കാനഡയില്‍ ചെറുവിമാനങ്ങള്‍ ആകാശത്തുവച്ച് കൂട്ടിയിടിച്ച് ഒരു വിമാനത്തിലെ പൈലറ്റ് മരിച്ചു. കാനഡയിലെ ഒത്താവയില്‍നിന്ന് 30 കിലോമീറ്റര്‍ പടിഞ്ഞാറ് മക് ഗീ സൈഡ് റോഡിലാണ് ഞായറാഴ്ച രാവിലെ അപകടം നടന്നത്. പരിശീലനപ്പറക്കല്‍ നടത്തുകയായിരുന്ന സെസ്‌ന വിമാനവും രണ്ടുയാത്രക്കാരുമായി പോയ 11 സീറ്റുകളുള്ള ചെറു യാത്രാവിമാനവുമാണ് കൂട്ടിയിടിച്ചത്. സെസ്‌ന വിമാനത്തിന്റെ പൈലറ്റാണ് മരിച്ചത്.
സെസ്‌ന വിമാനം ചെറു യാത്രാവിമാനത്തിന്റെ അടിഭാഗത്ത് വന്നിടിക്കുകയായിരുന്നുവെന്നാണ് റിപ്പോര്‍ട്ട്. ഇടിയെത്തുടര്‍ന്ന് സെസ്‌ന വിമാനം തകര്‍ന്ന് വീണു. യാത്രാ വിമാനം ഒത്താവ അന്താരാഷ്ട്ര വിമാനത്താവളത്തില്‍ ഇറക്കി. സംഭവത്തെക്കുറിച്ച് അന്വേഷിക്കുമെന്ന് ട്രാന്‍സ്‌പോര്‍ട്ട് കാനഡ വക്താവ് അറിയിച്ചു.