പേരൂര്‍ക്കട: തിരുവനന്തപുരം ജില്ലയില്‍ പകര്‍ച്ചപ്പനിയും മാരകമായ ഡങ്കിപ്പനിയും അപൂര്‍വമായി എച്ച്1 എന്‍1 പനിയും പടരുന്ന സാഹചര്യത്തില്‍ ബന്ധപ്പെട്ട മേഖലയിലെ ജില്ലാതല ഉദ്യോഗസ്ഥരുടെ പ്രത്യേക യോഗം കുടപ്പനക്കുന്ന് കളക്ടറേറ്റില്‍ നടന്നു.
പകര്‍ച്ചപ്പനി അധികമായ വെങ്ങാനൂര്‍, ബാലരാമപുരം, പള്ളിച്ചല്‍, മലയിന്‍കീഴ്, കരകുളം, വിളപ്പില്‍, വിളവൂര്‍ക്കല്‍, കല്ലിയൂര്‍ ഗ്രാമപ്പഞ്ചായത്തുകളില്‍ പനി തടയുന്നതിന് സ്വീകരിച്ച നടപടികള്‍ രണ്ട് ദിവസത്തിനകം ലഭ്യമാക്കാന്‍ കളക്ടര്‍ എസ്. വെങ്കടേസപതി പഞ്ചായത്ത് ഡെപ്യൂട്ടി ഡയറക്ടറോട് നിര്‍ദേശിച്ചു. പകര്‍ച്ചപനി തടയാന്‍ തിരുവനന്തപുരം നഗരസഭ സ്വീകരിച്ച പ്രതിരോധ മാര്‍ഗങ്ങളുടെ റിപ്പോര്‍ട്ടും രണ്ട് ദിവസത്തിനുള്ളില്‍ ലഭ്യമാക്കാന്‍ നഗരസഭാ സെക്രട്ടറിയോടും ജില്ലയിലെ മറ്റ് പഞ്ചായത്തുകളില്‍ പകര്‍ച്ചപനി തടയാന്‍ സ്വീകരിച്ച നടപടി റിപ്പോര്‍ട്ട് ഒരാഴ്ചയ്ക്കകം ലഭ്യമാക്കാന്‍ പഞ്ചായത്ത് ഡെപ്യൂട്ടി ഡയറക്ടര്‍, ജില്ലാ മെഡിക്കല്‍ ഓഫിസര്‍ എന്നിവരോടും കളക്ടര്‍ ആവശ്യപ്പെട്ടു.
മണ്‍സൂണ്‍ ഇടവേളകളില്‍ പകര്‍ച്ചവ്യാധികള്‍ പടരാന്‍ സാധ്യതയുള്ളതിനാല്‍ അതീവ ജാഗ്രത പാലിക്കാനും വേണ്ട പ്രതിരോധ പ്രവര്‍നത്തങ്ങള്‍ വേഗത്തിലാക്കാനും ജില്ലാ മെഡിക്കല്‍ ഓഫിസര്‍, പഞ്ചായത്ത് ഡെപ്യൂട്ടി ഡയറക്ടര്‍ എന്നിവരോട് കളക്ടര്‍ ആവശ്യപ്പെട്ടു. മാലിന്യം ഉറവിടത്തില്‍തന്നെ നിര്‍മാര്‍ജനം ചെയ്യുന്നതിന് ഓരോ വാര്‍ഡിന്റെയും ചുമതല ഒരു അങ്കണവാടി ഉദ്യോഗസ്ഥയെ ഏല്‍പിക്കും. വാര്‍ഡിലെ 25 വീടുകള്‍ക്ക് ഒരു സന്നദ്ധപ്രവര്‍ത്തക,പ്രവര്‍ത്തകന്‍ എന്ന നിലയില്‍ എല്ലാ വീടുകളും സന്ദര്‍ശിച്ച് വേണ്ട സഹായങ്ങള്‍ ചെയ്യും. ഉറവിടമാലിന്യ നിര്‍മാര്‍ജനത്തിന് കുടുംബശ്രീ പ്രവര്‍ത്തകര്‍, നഗരസഭാ ഉദ്യോഗസ്ഥര്‍, ആരോഗ്യവകുപ്പ് ഉദ്യോഗസ്ഥര്‍ വീടുകള്‍ സന്ദര്‍ശിക്കും. വിദ്യാലയങ്ങളില്‍ എല്ലാ വെള്ളിയാഴ്ചയും സര്‍ക്കാര്‍, അര്‍ധസര്‍ക്കാര്‍, സ്വകാര്യ സ്ഥാപനങ്ങള്‍ എന്നിവിടങ്ങളില്‍ ശനിയാഴ്ചകളിലും വീടുകളില്‍ ഞായറാഴ്ചകളിലും കര്‍ശനമായും ഡ്രൈഡേ ആചരിക്കണം. മണ്‍സൂണ്‍മഴ കുറഞ്ഞ സാഹചര്യത്തില്‍ പരമാവധി മഴവെള്ളസംഭരണ പ്രവര്‍ത്തനങ്ങള്‍ ചെയ്യാനും കളക്ടര്‍ ഉദ്യോഗസ്ഥരോട് നിര്‍ദേശിച്ചു. ഇതിനായി വിവിധതരം തടയണകള്‍ നിര്‍മിക്കണം. ശുചീകരണപ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന കുടുംബശ്രീ പ്രവര്‍ത്തകര്‍ക്ക് ഉള്‍പ്പെടെ കൃത്യമായി പ്രതിരോധ മരുന്നുകള്‍ നല്‍കാനും കൈഉറകളും മറ്റ് സുരക്ഷാ മാര്‍ഗങ്ങളും സ്വീകരിക്കാന്‍ വേണ്ട നടപടികള്‍ ചെയ്യാനും ജില്ലാ മെഡിക്കല്‍ ഓഫിസര്‍ക്ക് കളക്ടര്‍ നിര്‍ദേശം നല്‍കി. സര്‍ക്കാരിന്റെ ഭാഗത്ത് നിന്നുള്ള ഇത്തരം പ്രതിരോധ പ്രവര്‍ത്തനങ്ങള്‍ക്ക് പൊതുജനങ്ങളുടെ എല്ലാവിധ പിന്തുണയും ഉണ്ടാകണമെന്നും കളക്ടര്‍ അഭ്യര്‍ഥിച്ചു.