ചാത്തന്നൂര്‍: കല്ലുവാതുക്കല്‍ ഗ്രാമ പഞ്ചായത്തില്‍ കേരഗ്രാമം പദ്ധതി നടപ്പാക്കാന്‍ കൃഷിവകുപ്പ് അനുമതി നല്‍കിയതായി ജി.എസ് ജയലാല്‍ എം.എല്‍.എ അറിയിച്ചു. കാര്‍ഷിക മേഖലയില്‍ സമഗ്ര വികസനം നടപ്പാക്കുന്ന പുനര്‍ജ്ജനി ചാത്തന്നൂര്‍ പദ്ധതി മണ്ഡലത്തില്‍ നടപ്പാക്കുന്നതിന്റെ ഭാഗമായാണ് അനുമതി.
ഒരു കോടി രൂപ ചെലവിലാണ് പദ്ധതി നടപ്പാക്കുന്നത്.തെങ്ങ് കൃഷിയെ പ്രോല്‍സാഹിപ്പിക്കാനും സംരക്ഷിക്കാനും ഉതകുന്ന തരത്തില്‍ തെങ്ങുകളുടെ ഉത്പാദനവും ഉത്പാദനക്ഷമതയും വര്‍ദ്ധിപ്പിക്കുക, ഏകീകൃത കീടനാശിനി ഉപയോഗം പ്രോത്സാഹിപ്പിച്ച് തെങ്ങുകള്‍ രോഗവിമുക്തമാക്കുക, ഏകീകൃത പോഷക പദ്ധതി നടപ്പാക്കുക, മിശ്രവിളകള്‍ പ്രോല്‍സാഹിപ്പിക്കുക, ജലസേചന സൗകര്യങ്ങള്‍ വര്‍ധിപ്പിക്കുക, മൂല്യവര്‍ധിത ഉത്പന്നങ്ങള്‍ പ്രോല്‍സാഹിപ്പിക്കുക, ഗുണമേന്മയുള്ള നടീല്‍ വസ്തുക്കള്‍ ഉറപ്പാക്കുക, കൂടുതല്‍ തൊഴില്‍ അവസരങ്ങള്‍ സൃഷ്ടിക്കുക ഇവയാണ് ലക്ഷ്യം.
ഉല്‍പാദനവും ഉല്‍പാദന ക്ഷമതയും വര്‍ധിപ്പിക്കുന്നതിന് ശാസ്ത്രീയവും പ്രായോഗികവുമായ മാര്‍ഗങ്ങള്‍ അവലംബിക്കും. തെങ്ങിന്റെ തടം തുറക്കല്‍, കളകള്‍ നീക്കം ചെയ്യല്‍, പുതയിടല്‍ എന്നീ പരമ്പരാഗത മാര്‍ഗങ്ങള്‍ സ്വീകരിച്ച് മണ്ണിന്റെ ജലാംശം നിലനിര്‍ത്തുന്നതിനുള്ള പ്രവര്‍ത്തനങ്ങള്‍ നടപ്പാക്കും.മണ്ണിന്റെ അമ്ലത്വം പരിഹരിക്കാന്‍ കമ്മായം, ഡോളമൈറ്റ് എന്നിവ നല്‍കും. രാസവളങ്ങളും ജൈവവളങ്ങളും കീടനാശിനികളും ശാസ്ത്രീയാടിസ്ഥാനത്തില്‍ വിതരണം ചെയ്യും.
രോഗം ബാധിച്ചതും ഉല്‍പാദനക്ഷമത കുറഞ്ഞതുമായ തെങ്ങുകള്‍ മുറിച്ചുമാറ്റും. തെങ്ങുകയറ്റ യന്ത്രങ്ങള്‍ നല്‍കും.
ജൈവവള ഉല്‍പാദന യൂനിറ്റുകള്‍ സ്ഥാപിക്കും. ചാത്തന്നൂര്‍ നിയോജക മണ്ഡലത്തില്‍ പൂതക്കുളം, ചിറക്കര ഗ്രാമ പ്പഞ്ചായത്തുകള്‍ക്ക് പുറമെയാണ് ഇപ്പോള്‍ കേരഗ്രാമം പദ്ധതി കല്ലുവാതുക്കലിലും നടപ്പിലാക്കുന്നത്.