കോഴിക്കോട്: വിശുദ്ധ റമദാന് സോപാന സംഗീതജ്ഞന്റെ സംഗീത സമര്‍പ്പണം. പ്രസിദ്ധ സോപാനസംഗീതജ്ഞന്‍ ഞെരളത്ത് ഹരിഗോവിന്ദനാണ് റമദാന്റെ വിശുദ്ധിയെ പാടിപ്പുകഴ്ത്തുന്നത്.
റമദാന്‍ ഗീതം എന്ന പേരില്‍ ഇറങ്ങിയിരിക്കുന്ന വിഡിയോ നവമാധ്യമങ്ങളില്‍ വൈറലാവുകയാണ്. റമദാന്റെ വിശുദ്ധി പൂര്‍ണമായും ഉള്‍ക്കൊണ്ടാണ് ഹരിഗോവിന്ദന്റെ ആലാപനം. സംഗീതത്തിന് ജാതി, മത,വര്‍ഗ വിവേചനങ്ങളില്ലെന്നും അത് മനുഷ്യന്റെ മനസുകളെയും ആത്മാവിനെയും വിശുദ്ധമാക്കട്ടെയെന്നും അഭിപ്രായപ്പെട്ടാണ് റമദാന്‍ ഗീതം സമര്‍പ്പിച്ചിരിക്കുന്നത്.
നാഥാ... ജഗന്നാഥാ എന്ന് തുടങ്ങുന്ന ആലാപനത്തില്‍ നോമ്പിന്റെ വിശുദ്ധി വിവരിക്കുന്നുണ്ട്. ആത്മദളങ്ങളില്‍ ആനന്ദബിന്ദുവില്‍...അമൃതായ് നിറയുന്ന നോമ്പുകാലം തുടങ്ങുന്ന വരികള്‍ ഇടയ്ക്കയുടെ പശ്ചാത്തലത്തില്‍ മനോഹരമായി ആവിഷ്‌കരിച്ചിട്ടുണ്ട്.
അനില്‍ മങ്കട രചിക്കുകയും ജയകുമാര്‍ ചിത്രീകരിക്കുകയും ചെയ്തതാണ് റമദാന്‍ ഗീതം. ക്ഷേത്ര വാദ്യോപകരണമായ ഇടയ്ക്കയെ ജനകീയമാക്കിയ കലാകാരനാണ് ഹരിഗോവിന്ദന്‍. ഇടയ്ക്കയുടെ പശ്ചാത്തലത്തില്‍ വ്യത്യസ്തമായ അന്‍പതോളം സംഗീത സൃഷ്ടികള്‍ ഇദ്ദേഹം നടത്തിയിട്ടുണ്ട്.
സുപ്രസിദ്ധ സോപാനഗായകന്‍ ഞെരളത്ത് രാമപ്പൊതുവാളിന്റെ മകനായ ഹരി ഗോവിന്ദന്‍ പിതാവില്‍നിന്നു തന്നെയാണ് സംഗീതം പഠിച്ചത്. 1996 ല്‍ പിതാവിന്റെ മരണശേഷമാണ് സോപാനസംഗീതാവതരണത്തില്‍ സജീവമായത്.
ആയിരക്കണക്കിന് വേദികളില്‍ തന്റെ കഴിവ് തെളിയിച്ചിട്ടുണ്ട്. എഴുത്തുകാരന്‍ കൂടിയായ ഇദ്ദേഹത്തിന് നിരവധി അവാര്‍ഡുകളും ലഭിച്ചിട്ടുണ്ട്.