അലനല്ലൂര്‍: ഏറെ കാലമായി എടത്തനാട്ടുകര ഉപ്പുകുളം പൊന്‍പാറ ചോലമണ്ണ് പ്രദേശവാസികളുടെ പേടിസ്വപ്നമായിരുന്ന പുള്ളിപുലിയെ പിടികൂടി. മാസങ്ങളായി പ്രദേശവാസികളുടെ വളര്‍ത്തുമൃഗങ്ങളെ സ്ഥിരമായി അക്രമിച്ചിരുന്ന പുലിയെ പിടികൂടാനായി വനം വകുപ്പ് സ്ഥാപിച്ച കെണിയിലാണ് പുലി കുടുങ്ങിയത്.
ബുധനാഴ്ച ഉച്ചയോടെ നാട്ടുകാരുടെ നിര്‍ബന്ധ പ്രകാരമാണ് വനം വകുപ്പ് ഇവിടെ കെണി സ്ഥാപിച്ചത്.
ജനവാസ ഉപ്പുകുളം സെന്റ് വില്യംസ് പള്ളിക്ക് സമീപത്തെ വീട്ടില്‍ നിന്ന് ചൊവ്വാഴ്ചയും ആടുകളെ കാണാതായിരുന്നു. ഇതേ തുടര്‍ന്ന് നാട്ടുകാരും വനംവകുപ്പും നടത്തിയ അന്വേഷണത്തിലാണ് പുലിയുടെ സാന്നിധ്യം തിരിച്ചറിഞ്ഞത്. ബുധനാഴ്ച രാത്രി പത്തരയോടെയാണ് മൂന്ന് വയസ് തോന്നിക്കുന്ന പുള്ളിപ്പുലി കെണിയിലായത്. പുലിക്ക് ഇരയായി കൂട്ടില്‍ നായയെ വച്ചിരുന്നു.
കൂട്ടിലായ പുലിക്കു പുറമെ മറ്റൊരു പുലിയെയും കണ്ടതായും ഇത് പിന്നീട് ഓടി പോകുന്നതായി കണ്ടുവെന്നും നാട്ടുകാര്‍ പറഞ്ഞു.
പിടികൂടിയ പുലിയെ രാത്രി പതിനൊന്നരയോടെ വൈല്‍ഡ് ലൈഫ് വാര്‍ഡന്‍, നാട്ടുകല്‍ എസ്.ഐ, ഡെ. റെയ്ഞ്ചര്‍, മണ്ണര്‍ക്കാട് ആര്‍.ആര്‍.ടി, പ്രദേശ വാസികള്‍ എന്നിവരുടെ സഹായത്തോടെയാണ് പുലിയെ അധികൃതര്‍ കൊണ്ട് പോയത്.