തിരൂര്‍: പറവണ്ണയിലെ ഓട്ടോ ഡ്രൈവര്‍ മുഹമ്മദ് യാസീനെ കുത്തിക്കൊലപ്പെടുത്തിയ കേസില്‍ ഒളിവില്‍ പോയ പ്രധാന പ്രതികളിലൊരാള്‍ പൊലിസ് കസ്റ്റഡിയില്‍. അറസ്റ്റിലായ പ്രതി പള്ളത്ത് ആദത്തിന്റെ സഹോദരന്‍ പള്ളത്ത് നൗഷാദിനെയാണ് തിരൂര്‍ പൊലിസ് കസ്റ്റഡിയിലെടുത്തത്. കൊലപാതക ശേഷം മുങ്ങിയ നൗഷാദിനെ ഇന്നലെ പുലര്‍ച്ചെയോടെ വിദഗ്ധമായി കുടുക്കുകയായിരുന്നുവെന്ന് അന്വേഷണ സംഘം പറഞ്ഞു. എന്നാല്‍ ഇക്കാര്യം സംബന്ധിച്ച കൂടുതല്‍ വിവരങ്ങള്‍ പൊലിസ് വ്യക്തമാക്കിയില്ല.
മുഹമ്മദ് യാസീന്റെ കൊലപാതകത്തിന് ശേഷം നൗഷാദ് വിദേശത്തേക്ക് കടന്നതായി അഭ്യൂഹങ്ങളുണ്ടായിരുന്നു. പ്രതിയുടെ അറസ്റ്റ് വൈകിയതും പൊലിസിനെതിരെ ജനകീയരോഷത്തിനുമിടയാക്കി.
ഇതിനിടയില്‍ നൗഷാദിനെ ഒരാഴ്ചക്കകം അറസ്റ്റ് ചെയ്യുമെന്ന് പൊലിസ് വ്യക്തമാക്കിയിരുന്നു. രാത്രിയില്‍ ഓട്ടോറിക്ഷ ഓട്ടം പോകാത്തതിനെ തുടര്‍ന്നുണ്ടായ തര്‍ക്കത്തിനിടെ യാസീനെ കത്തിക്കൊണ്ട് കുത്തിക്കൊലപ്പെടുത്തുകയായിരുന്നു. പ്രതിയുടെ അറസ്റ്റ് ഉടനുണ്ടാകുമെന്നാണ് തിരൂര്‍ സി.ഐയുടെ നേതൃത്വത്തിലുള്ള അന്വേഷണ സംഘം നല്‍കുന്ന സൂചന.