എഡിന്‍ബര്‍ഗ്: ടെസ്റ്റ് പദവിയുള്ള രാജ്യത്തിനെതിരേ ആദ്യ ഏകദിന വിജയം സ്വന്തമാക്കി സ്‌കോട്‌ലന്‍ഡ്. സിംബാബ്‌വെക്കെതിരായ ഏകദിന പരമ്പരയിലെ ആദ്യ മത്സരത്തിലാണ് സ്‌കോട്‌ലന്‍ഡ് ചരിത്ര വിജയം സ്വന്തമാക്കിയത്. മഴയെ തുടര്‍ന്ന് ഡെക്ക്‌വര്‍ത്ത് ലൂയീസ് നിയമപ്രകാരം 26 റണ്‍സിനാണ് സ്‌കോട്‌ലന്‍ഡ് വിജയിച്ചത്. ആദ്യം ബാറ്റ് ചെയ്ത സ്‌കോട്‌ലന്‍ഡ് നിശ്ചിത 50 ഓവറില്‍ ആറ് വിക്കറ്റ് നഷ്ടത്തില്‍ 317 റണ്‍സെന്ന മികച്ച സ്‌കോര്‍ പടുത്തുയര്‍ത്തി. മറുപടി പറയാനിറങ്ങിയ സിംബാബ്‌വെയുടെ വിജയ ലക്ഷ്യം 43 ഓവറില്‍ 299 റണ്‍സായി പുനര്‍നിര്‍ണയിച്ചു. അവരുടെ പോരാട്ടം 41.4 ഓവറില്‍ 272 റണ്‍സില്‍ അവസാനിപ്പിച്ചാണ് സ്‌കോട്‌ലന്‍ഡ് വിജയം സ്വന്തമാക്കിയത്. സ്‌കോട്‌ലന്‍ഡിനായി നായകന്‍ കെയ്‌ലന്‍ കോട്‌സര്‍ സെഞ്ച്വറി നേടി (109). രണ്ട് മത്സരങ്ങളടങ്ങിയ പരമ്പരയില്‍ സ്‌കോട്‌ലന്‍ഡ് 1-0ത്തിന് മുന്നിലെത്തി.