മലപ്പുറം: 'മുഹമ്മദ് നബി(സ്വ) അനുപമ വ്യക്തിത്വം' എന്ന പ്രമേയവുമായി സുന്നി യുവജന സംഘം സംസ്ഥാനവ്യാപകമായി ആചരിക്കുന്ന മീലാദ് കാംപയിന്റെ ഭാഗമായി നാളെ മലപ്പുറത്ത് മീലാദ് വിളംബര റാലിയും പൊതുസമ്മേളനവും നടക്കും. റാലി വൈകിട്ട് നാലിന് മലപ്പുറം കുന്നുമ്മല്‍ എം.എസ്.പി ക്യാംപ് പരിസരത്ത്‌നിന്ന് ആരംഭിക്കും.
ജില്ലയിലെ ആമില അംഗങ്ങളും വിവിധ യൂനിറ്റുകളില്‍നിന്നുള്ള ആയിരക്കണക്കിന് ബഹുജനങ്ങളും റാലിയില്‍ അണിനിരക്കും. റാലി കുന്നമ്മല്‍ മുനിസിപ്പല്‍ ബസ് സ്റ്റാന്‍ഡ് വഴി സുന്നി മഹല്‍ പരിസരത്ത് പ്രത്യേകം സജ്ജമാക്കിയ നഗരിയില്‍ സമാപിക്കും.
വൈകീട്ട് അഞ്ചിന് മൗലിദ് പാരായണം ആരംഭിക്കും. കെ.എ റഹ്മാന്‍ ഫൈസി, പുത്തനഴി മൊയ്തീന്‍ ഫൈസി, സയ്യിദ് കെ.കെ.എസ് തങ്ങള്‍ വെട്ടിച്ചിറ, സയ്യിദ് ബി.എസ്.കെ തങ്ങള്‍ നേതൃത്വം നല്‍കും. 5.30ന് പൊതു സമ്മേളനം ആരംഭിക്കും. എസ്.വൈ.എസ് ജില്ലാ ജനറല്‍ സെക്രട്ടറി അബ്ദുസ്സമദ് പൂക്കോട്ടൂര്‍ ആമുഖ പ്രഭാഷണം നടത്തം. ജില്ലാ പ്രസിഡന്റ് പാണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷനാകും.
സംസ്ഥാന വൈസ് പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തും. അല്‍ ഹാഫിള് അഹമദ് കബീര്‍ ബാഖവി പ്രമേയ പ്രഭാഷണം നടത്തും. അലവി ദാരിമി കുഴിമണ്ണ ആദര്‍ശ പ്രഭാഷണം നടത്തും. എം.ടി അബൂബക്കര്‍ ദാരിമി സംശയ നിവാരണം നടത്തും.