നിലയ്ക്കല്‍: ബി.ജെ.പി നേതാക്കളെ പൊലിസ് തടഞ്ഞതിനെത്തുടര്‍ന്ന് നിലയ്ക്കലില്‍ വാക്കേറ്റം. സ്വകാര്യ വാഹനത്തില്‍ പമ്പയിലേക്ക് പുറപ്പെട്ട പി.കെ കൃഷ്ണദാസ്, എ.എന്‍ രാധാകൃഷ്ണന്‍ എന്നിവരുടെ വാഹനമാണ് തടഞ്ഞത്. ഇവരോട് കെ.എസ്.ആര്‍.ടി ബസില്‍ പമ്പയിലേക്ക് പോകണമെന്ന് ആവശ്യപ്പെട്ടതാണ് തര്‍ക്കത്തിലേക്ക് നയിച്ചത്.

മാധ്യമപ്രവര്‍ത്തകരുടേയും സര്‍ക്കാര്‍ വാഹനങ്ങളും മാത്രമാണ് കടത്തിവിട്ടിട്ടുള്ളൂവെന്നും അതിനാല്‍ പമ്പയിലേക്ക് കെ.എസ്.ആര്‍.ടി.സി ബസില്‍ പോകണമെന്നുമാണ് പൊലിസ് ആവശ്യപ്പെട്ടത്. എന്നാല്‍ സ്വകാര്യ വാഹനങ്ങള്‍ കടത്തിവിട്ടിട്ടുണ്ടെന്നും തങ്ങള്‍ക്കും കടന്നുപോകണമെന്നുമാണ് ബി.ജെ.പി നേതാക്കള്‍ വാദിച്ചത്.

അതേസമയം, പൊലിസ് ഇത് അനുവദിക്കാത്ത സാഹചര്യത്തില്‍ ബി.ജെ.പി നേതാക്കള്‍ ഏറെ നേരത്തെ തര്‍ക്കത്തിനൊടുവില്‍ കെ.എസ്.ആര്‍.ടി.സി ബസില്‍ പമ്പയിലേക്ക് പോയി.