മാള: മാള ഐ.സി.ഡി.എസ് പ്രൊജക്ടിന്റെ കീഴിലുള്ള അങ്കണവാടി ജീവനക്കാരുടെ വളരെ നാളുകളായുള്ള ആവശ്യങ്ങള്‍ക്കു നേരെ മുഖം തിരിക്കുന്ന ബന്ധപ്പെട്ട അധികൃതരുടെ നിലപാടിനെതിരേ പ്രത്യക്ഷ സമരത്തിന് ഇറങ്ങുമെന്നു മുന്നറിയിപ്പ്.
ഐ.എന്‍.ടി.യു.സി മുഖേന പലതവണ നിവേദനങ്ങള്‍ വഴി ആവശ്യമുന്നയിച്ചിട്ടും നടപടികള്‍ സ്വീകരിക്കാത്തതിനെതിരേയാണ് സമരത്തിന് ഇറങ്ങുന്നതെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
അങ്കണവാടി മാള ഐ.സി.ഡി.എസ് പ്രൊജക്ടിന്റെ കീഴില്‍ ജോലി ചെയ്യുന്ന താല്‍ക്കാലിക ജീവനക്കാരെ സ്ഥിരപ്പെടുത്തുക, അങ്കണവാടി ജീവനക്കാര്‍ക്ക് ഇ.എസ്.ഐ, പി.എഫ് നടപ്പിലാക്കുക, ഐ.സി.ഡി.എസ് മാള ഓഫിസിലെ ഒഴിവുള്ള ക്ലാര്‍ക്ക്, സൂപ്പര്‍വൈസര്‍ തസ്തികകളില്‍ നിയമനം നടത്തുക, പഞ്ചായത്തുകളില്‍ നിന്നും നല്‍കി കൊണ്ടിരുന്ന അധികവേദനം പുനഃസ്ഥാപിക്കുക, പച്ചക്കറി, പലവ്യഞ്ചനം എന്നിവയുടെ തുക വര്‍ധിപ്പിക്കുക, ഗ്രാമസഭകളിലെ നോട്ടീസ് നല്‍കുന്ന ജോലിയില്‍ നിന്നും അങ്കണവാടി ജീവനക്കാരെ ഒഴിവാക്കുകയോ അതിനായുള്ള അര്‍ഹമായ വേതനം നല്‍കുകയോ ചെയ്യുക, മാള പഞ്ചായത്തിലെ ഒഴിവുള്ള സൂപ്പര്‍വൈസര്‍ തസ്തികയില്‍ ഉടനെ നിയമനം നടത്തുക എന്നിവയാണ് വര്‍ക്കര്‍മാര്‍ ആവശ്യപ്പെടുന്നത്. ഐ.സി.ഡി.എസ് ഓഫിസില്‍ ജീവനക്കാരുടെ കുറവു മൂലം ആറാം പ്രവൃത്തി ദിവസം ലഭിക്കേണ്ട ഓണറേറിയം 14-ാം തിയതി വരെ നീളുകയാണ്. 18-ാം തിയ്യതി കിട്ടിയിരുന്ന ഓണറേറിയം ഓഫിസറുടെ പരിശ്രമം മൂലമാണ് നാലു ദിവസം നേരത്തെയായത്. ഒരു കുട്ടിക്ക് 50 പൈസ വീതമാണ് ഭക്ഷണത്തിനായി അനുവദിക്കുന്നത്. ഇത് ഒരുരൂപയായെങ്കിലും വര്‍ധിപ്പിക്കണം.
മൂന്നും നാലും പതിറ്റാണ്ടുകള്‍ വരെ തങ്ങള്‍ പ്രവര്‍ത്തിച്ചാലും പിരിഞ്ഞ് പോകുമ്പോള്‍ വെറും ആയിരം രൂപ പെന്‍ഷനായി ലഭിക്കുക മാത്രമാണ് ആനുകൂല്യമായുള്ളത്. നിലവില്‍ വര്‍ക്കര്‍ക്ക് 10,000 രൂപയും സഹായിക്ക് 7000 രൂപയുമാണ് ഓണറേറിയമായി ലഭിക്കുന്നത്. കാലാനുസൃതമായിത് വര്‍ധിപ്പിക്കണം. മാള ഐ.സി.ഡി.എസ് പ്രൊജക്ടിന് കീഴില്‍ 145 വര്‍ക്കര്‍മാരും 145 സഹായികളുമുള്ളതില്‍ 40 പേര്‍ താല്‍ക്കാലിക ജീവനക്കാരാണ്. ഉടനെ ആവശ്യങ്ങള്‍ നടപ്പാക്കിയില്ലെങ്കില്‍ അടുത്ത യോഗത്തില്‍ തീരുമാനം എടുത്ത് സമരരംഗത്തിറങ്ങുമെന്ന് വാര്‍ത്താ സമ്മേളനത്തില്‍ സംബന്ധിച്ച ജില്ലാ വൈസ് പ്രസിഡന്റ് എ. ഉഷാകുമാരി, എന്‍. ഗീത, പി.പി ജെസി, ബേബി ലാസര്‍ അറിയിച്ചു.