കോഴിക്കോട്: ജില്ലയില്‍ സി.പി.എമ്മും ബി.ജെ.പിയും തുടര്‍ച്ചയായി നടത്തുന്ന അക്രമ രാഷ്ട്രീയത്തിനെതിരേ ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ ഏകദിന സത്യഗ്രഹം സംഘടിപ്പിച്ചു. 'കോഴിക്കോടിനെ കാക്കാന്‍, സമാധാനം വീണ്ടെടുക്കാന്‍, അക്രമികളെ ഒറ്റപ്പെടുത്താന്‍' മുദ്രാവാക്യവുമായി 'സ്വസ്ഥം' എന്ന പേരില്‍ സംഘടിപ്പിച്ച സത്യഗ്രഹം കോഴിക്കോട് മാവൂര്‍ റോഡില്‍ പി.സി വിഷ്ണുനാഥ് എം.എല്‍.എ ഉദ്ഘാടനം ചെയ്തു. ആതിഥേയത്വത്തിന്റെയും കലാ-സാഹിത്യ സാംസ്‌കാരിക പ്രവര്‍ത്തനങ്ങളുടെയും മഹാനഗരത്തില്‍ അശാന്തി കൊണ്ടുവരാനുള്ള ശ്രമങ്ങള്‍ക്ക് തടയിടണമെന്ന് അദ്ദേഹം പറഞ്ഞു. സ്വന്തം പാര്‍ട്ടി ഓഫിസിനും സെക്രട്ടറിക്കും നേരെ നടന്ന അക്രമ കേസുകളിലെ പ്രതികളെ പോലും പിടികൂടാനാകാത്ത പാര്‍ട്ടിയും സര്‍ക്കാരും പിന്നെ എന്തു സമാധാനമാണ് ജനങ്ങള്‍ക്ക് ഉറപ്പുവരുത്തുന്നതെന്നും അദ്ദേഹം ചോദിച്ചു.
ഡി.സി.സി പ്രസിഡന്റ് ടി. സിദ്ദീഖ് അധ്യക്ഷനായി. അക്രമങ്ങള്‍ക്കെതിരേ നടപടിയെടുക്കാന്‍ നിയമവും പോലിസുമുള്ളപ്പോള്‍ എന്തിനാണ് പാര്‍ട്ടികളുടെ ഹര്‍ത്താല്‍ ആഹ്വാനമെന്ന് ചടങ്ങില്‍ പങ്കെടുത്ത സാഹിത്യകാരന്‍ എം.എന്‍ കാരശ്ശേരി ചോദിച്ചു. സംസ്ഥാനത്ത് പൊലിസിനെ നിയന്ത്രിക്കേണ്ട സ്ഥിതിവിശേഷമാണുള്ളതെന്ന് പ്രതിപക്ഷ ഉപനേതാവ് എം.കെ മുനീര്‍ എം.എല്‍.എ പറഞ്ഞു.
പത്മശ്രീ ജേതാവ് മീനാക്ഷി ഗുരുക്കള്‍, ചരിത്രകാരന്‍ എം.ജി.എസ് നാരായണന്‍, എഴുത്തുകാരി ഇ.പി ജ്യോതി, നടന്‍ മാമുക്കോയ, രാഷ്ട്രീയ നിരീക്ഷകന്‍ അഡ്വ. ജയശങ്കര്‍, എ.ഐ.സി.സി അംഗം പി.വി ഗംഗാധരന്‍, എം.പിമാരായ എം.കെ രാഘവന്‍, എം.ഐ ഷാനവാസ്, യു.ഡി .എഫ് ജില്ലാ ചെയര്‍മാന്‍ അഡ്വ. പി. ശങ്കരന്‍, കെ.പി.സി.സി ജനറല്‍ സെക്രട്ടറി അഡ്വ. പി.എം സുരേഷ്ബാബു, സെക്രട്ടറിമാരായ അഡ്വ. പ്രവീണ്‍കുമാര്‍, അഡ്വ. ജയന്ത്, കെ.സി അബു, കെ.എസ്.യു സംസ്ഥാന പ്രസിഡന്റ് കെ.എം അഭിജിത്ത്, കെ.പി.സി.സി നിര്‍വാഹകസമിതി അംഗം പി. മൊയ്തീന്‍ മാസ്റ്റര്‍ സംബന്ധിച്ചു.