കാട്ടാക്കട: പൊതു ചന്തയില്‍ വില്‍പ്പനയ്ക്കായി സൂക്ഷിച്ചിരുന്ന അഴുകിയതും പുഴുവരിച്ചതുമായ മത്സ്യങ്ങള്‍ ആരോഗ്യ വകുപ്പ് പിടിച്ചെടുത്തു നശിപ്പിച്ചു. പൂവച്ചല്‍ ഗ്രാമ പഞ്ചായത്തും ആരോഗ്യ വകുപ്പും നടത്തിയ സംയുക്ത പരിശോധനയിലാണ് ഇവ കണ്ടെടുത്തത്. കൊഴിയാള, പാര ഉള്‍പ്പടെ നൂറു കിലോയോളം പച്ച മത്സ്യവും നൂറ്റി അന്‍പതോളം കിലോ ഉണക്ക മത്സ്യവുമാണ് കണ്ടെത്തിയത്.

പിടിച്ചെടുത്ത പച്ച മത്സ്യത്തില്‍ നിറ വ്യത്യാസവും കണ്ണുകള്‍ അഴുകിയതും പുഴുവരിച്ചതും ആയ മത്സ്യങ്ങള്‍ കണ്ടെടുത്തു. ഉണക്ക കരുവാട് എലികള്‍ വസിക്കുന്ന വൃത്തിഹീനമായ സ്ഥലത്താണ് സൂക്ഷിച്ചിരുന്നത്. അഴുകിയ പച്ചമത്സ്യങ്ങള്‍ ചന്തയ്ക്കു പുറകില്‍ കുഴിയെടുത്തു മൂടുകയും ഉണക്ക മല്‍സ്യങ്ങള്‍ കത്തിക്കുകയും ചെയ്തു. ചന്തയ്ക്കു സമീപം പ്രവര്‍ത്തിക്കുന്ന ടീ സ്റ്റാളുകള്‍, ഹോട്ടല്‍, ബേക്കറി, മാര്‍ജിന്‍ഫ്രീ, ഇറച്ചിക്കടകള്‍ എന്നിവിടങ്ങളിലും പരിശോധന നടത്തി.
ടീ സ്റ്റാളില്‍ ശേഖരിച്ചു വച്ചിരുന്ന വെള്ളത്തില്‍ കൂത്താടി കണ്ടെത്തി. തയ്ക്ക പള്ളിക്കു സമീപം സ്ഥിതി ചെയ്യുന്ന ആദില ഹോട്ടലില്‍ നടത്തിയ പരിശോധനയില്‍ സ്ഥാപനം ലൈസന്‍സ് ഇല്ലാതെയാണ് പ്രവര്‍ത്തിക്കുന്നതെന്നും ഇവിടെ പണിയെടുക്കുന്ന ഇതരസംസ്ഥാന തൊഴിലാളികള്‍ ഉള്‍പ്പടെയുള്ളവര്‍ക്ക് ഹെല്‍ത്ത് കാര്‍ഡ് ഇല്ലായെന്നും കണ്ടെത്തി.
ഇതിനു സമീപം പ്രവര്‍ത്തിക്കുന്ന ചിക്കന്‍ സ്റ്റാളിനും ലൈസന്‍സ് ഉണ്ടായിരുന്നില്ല. ഇവയ്‌ക്കെല്ലാം സ്റ്റോപ്പ് മെമ്മോ നല്‍കി.
ക്രിസ്ത്യന്‍ പള്ളിക്കു മുന്‍വശം പ്രവര്‍ത്തിക്കുന്ന മാര്‍ജിന്‍ഫ്രീ ഷോപ്പില്‍ കാലാവധി കഴിഞ്ഞ പാനീയങ്ങള്‍ ഉള്‍പ്പടെയുള്ളവ കണ്ടെത്തിയതിനാല്‍ സ്ഥാപനത്തിന് നോട്ടിസ് നല്‍കി.
പഞ്ചായത്ത് പ്രസിഡന്റ് രാമചന്ദ്രന്‍ , ആരോഗ്യ സ്റ്റാന്റിങ് കമ്മിറ്റി ചെയര്‍മാന്‍ മണികണ്ഠന്‍, പഞ്ചായത്ത് അസിസ്റ്റന്റ് സെക്രട്ടറി ഹെല്‍ത്ത് ഇന്‍സ്‌പെക്ടര്‍ സത്യന്‍, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ ജോണി, ജോസ്, ശ്രീകുമാര്‍ എന്നിവരും കാട്ടാക്കട പൊലിസും പരിശോധനയില്‍ പങ്കെടുത്തു.
മാര്‍ക്കറ്റില്‍ സ്ഥിരമായി ഫോര്‍മാലിന്‍ കലര്‍ന്ന മത്സ്യം വില്‍പ്പന നടത്തുന്നുവെന്ന പരാതിയുടെ അടിസ്ഥാനത്തിലായിരുന്നു പരിശോധന.

.