കൊണ്ടോട്ടി: പെരുന്നാള്‍ തിരക്ക് മുന്‍നിര്‍ത്തി എയര്‍ഇന്ത്യ എക്‌സ്പ്രസ് റിയാദ്-കരിപ്പൂര്‍-തിരുവനന്തപുരം സെക്ടറില്‍ ജൂണ്‍ 22ന് പ്രത്യേക സര്‍വിസ് നടത്തും. ചെറിയപെരുന്നാളിന് നാട്ടിലെത്തുന്നതിനുള്ള യാത്രക്കാരുടെ തിരക്ക് വര്‍ധിച്ചതോടെയാണ് പ്രത്യേക സര്‍വിസ് നടത്തുന്നത്.
റിയാദില്‍നിന്ന് പകല്‍ 11.45ന് പുറപ്പെടുന്ന വിമാനം രാത്രി 8.45ന് കരിപ്പൂരിലെത്തും. പിന്നീട് രാത്രി 10നാണ് തിരുവനന്തപുരത്തേക്ക് പുറപ്പെടുക. രാത്രി 10.45ന് തിരുവനന്തപുരത്തേക്കുള്ള എയര്‍ഇന്ത്യ എക്‌സ്പ്രസിന്റെ പതിവ് സര്‍വിസ് അന്ന് ഉണ്ടാകില്ല. പകരം റിയാദില്‍ നിന്നെത്തുന്ന വിമാനമാണ് തിരുവനന്തപുരത്തേക്ക് സര്‍വിസ് നടത്തുക. 189 യാത്രക്കാര്‍ക്ക് സഞ്ചരിക്കാവുന്ന ബി 737-800 ആണ് റിയാദിലേക്കായി എക്‌സ്പ്രസ് ഉപയോഗിക്കുന്നത്.
കഴിഞ്ഞ ഡിസംബറിലാണ് എയര്‍ഇന്ത്യ എക്‌സ്പ്രസ് റിയാദിലേക്ക് സര്‍വിസ് ആരംഭിച്ചത്. ആഴ്ചയില്‍ നാല് ദിവസം മാത്രമാണ് റിയാദില്‍നിന്ന് കരിപ്പൂരിലേക്ക് വിമാനമുള്ളത്. ഇത് ഏഴു ദിവസമാക്കാനുള്ള ശ്രമങ്ങള്‍ ആരംഭിച്ചിട്ടുണ്ട്.