കൊച്ചി: സാക്ഷരതാ പ്രവര്‍ത്തനങ്ങളില്‍ കേരളം ലോകത്തിനാകെ പ്രചോദനവും വഴികാട്ടിയുമാണെന്ന് പ്രധാനമന്ത്രി നരേന്ദ്രമോദി. പി.എന്‍ പണിക്കര്‍ ഫൗണ്ടേഷന്‍ സംഘടിപ്പിച്ച വായനാദിനമാസാചരണത്തിന്റെ ദേശീയതല ഉദ്ഘാടനം എറണാകുളം സെന്റ് തെരേസാസ് കോളജ് ഓഡിറ്റോറിയത്തില്‍ നിര്‍വഹിക്കുകയായിരുന്നു അദ്ദേഹം. നൂറു ശതമാനം സാക്ഷരത കൈവരിച്ച ആദ്യ ജില്ല കേരളത്തിലാണ്. ഈ നേട്ടം കൈവരിച്ച ആദ്യ സംസ്ഥാനവുമാണിത്. നൂറുശതമാനം പ്രാഥമിക വിദ്യാഭ്യാസം നടപ്പാക്കിയ ആദ്യ സംസ്ഥാനവും കേരളമാണ്. ഈ നേട്ടം സര്‍ക്കാരിനെക്കൊണ്ട് മാത്രം കൈവരിക്കാനാവില്ല.
കേരളത്തിലെ സാക്ഷരതാ മുന്നേറ്റത്തില്‍ സ്‌കൂളുകളും ലൈബ്രറികളും സാമൂഹിക-സാംസ്‌കാരിക-മത സംഘടനകളും മുഖ്യപങ്കുവഹിച്ചു. ജനകീയ പങ്കാളിത്തമുള്ള മുന്നേറ്റമാണ് സാക്ഷരത യജ്ഞത്തില്‍ കണ്ടത്. ഗ്രന്ഥശാലകളുടെ ശൃംഖല സൃഷ്ടിച്ചത് പി.എന്‍ പണിക്കരാണ്. 1945ല്‍ ഗ്രന്ഥശാലാ സംഘം രൂപീകരിച്ച് 47 ഗ്രാമീണ ഗ്രന്ഥശാലകളുമായാണ് അദ്ദേഹം ഇതിനു തുടക്കംകുറിച്ചത്. വായനയും അറിവുനേടലും ജോലിക്കായി മാത്രമാവരുത്. അത് സമൂഹത്തിനും രാഷ്ട്രത്തിനും ഉപകാരപ്പെടണം. ഒരു സ്ത്രീയെ വിദ്യാസമ്പന്നയാക്കിയാല്‍ രണ്ടു കുടുംബങ്ങളെ അവര്‍ പഠിപ്പിക്കുമെന്നൊരു ചൊല്ലുണ്ട്. സ്ത്രീ വിദ്യാഭ്യാസ വളര്‍ച്ചയിലും കേരളം മികച്ച ഉദാഹരണമാണ്. 2022 ഓടെ പാവപ്പെട്ട 30 കോടി ആളുകളെ വായനയിലേക്ക് നയിക്കുന്ന വലിയൊരു ദൗത്യം ആരംഭിച്ചിരിക്കുകയാണ്. ഡിജിറ്റല്‍ അടക്കമുള്ള സാക്ഷരതാ ദൗത്യം സാമൂഹികസാമ്പത്തിക മാറ്റത്തിന് വഴിതെളിക്കട്ടെയെന്നും പ്രധാനമന്ത്രി പറഞ്ഞു.
വായനമാസാചരണത്തിന്റെ പോസ്റ്ററും യോഗ പൈതൃകം സുവനീറും പ്രധാനമന്ത്രി പ്രകാശനംചെയ്തു. ഗവര്‍ണര്‍ ജസ്റ്റിസ് പി. സദാശിവം അധ്യക്ഷനായി. രാജ്യസഭാ ഉപാധ്യക്ഷന്‍ പി.ജെ കുര്യന്‍, എം.പിമാരായ കെ.വി തോമസ്, സുരേഷ് ഗോപി എന്നിവര്‍ക്കൊപ്പം എന്‍. ബാലഗോപാല്‍, കുമ്മനം രാജശേഖരന്‍, കൈതപ്രം വാസുദേവന്‍ നമ്പൂതിരി പങ്കെടുത്തു. പുസ്തകം നല്‍കിയാണ് വിശിഷ്ടവ്യക്തികളെ സ്വീകരിച്ചത്. 21 സംസ്ഥാനങ്ങളില്‍ സംഘടിപ്പിക്കുന്ന മാസാചരണത്തില്‍ ഡിജിറ്റല്‍ വായനയിലൂടെയുള്ള ശാക്തീകരണത്തിനാണ് പ്രാധാന്യം നല്‍കിയിരിക്കുന്നത്.