മണ്ണഞ്ചേരി : കുരുന്നുകളുടെ ഉള്ളില്‍ ആദ്യ അറിവിന്റെ തിളക്കമേകാന്‍ അങ്കണപ്പൂമഴ എത്തി.  അങ്കണവാടികളില്‍ ആദ്യമായി കുരുന്നുകള്‍ക്ക് പാഠഭാഗമായി എത്തിയ പുസ്തകമാണ് അങ്കണപ്പൂമഴ.
രാജ്യത്തിന്റെ ചരിത്രത്തില്‍ ഏറ്റവും പ്രായം കുറഞ്ഞവരുടെ ഔദ്യോഗികമായ പുസ്തകം എന്ന ബഹുമതിയും അങ്കണപ്പൂമഴയിലൂടെ കേരളത്തിന് സ്വന്തമായി.
ചിത്രങ്ങള്‍ വരയ്ക്കല്‍, നിറക്കൂട്ടുകള്‍ ചാര്‍ത്തല്‍, പ്രകൃതിഭംഗിനിറച്ച ചിത്രങ്ങളിലെ വ്യത്യാസങ്ങള്‍ കണ്ടുപിടിക്കല്‍, വിവധങ്ങളായ പഴങ്ങളും പച്ചക്കറികളും പരിചയപ്പെടുത്തല്‍, കളികളും കളിപ്പാട്ടങ്ങളേ കുറിച്ചുമുള്ള അറിവു പകരല്‍, ദേശീയപ്രസ്ഥാനത്തിലെ നേതാക്കളുടെ ചിത്രങ്ങള്‍, വാര്‍ത്താമാധ്യമങ്ങളിലേയ്ക്കുള്ള ശ്രദ്ധക്ഷണിക്കല്‍ അങ്ങനെ വ്യത്യസ്തങ്ങളായ വിഭവങ്ങളാണ് അങ്കണപ്പൂമഴയിലൂടെ കുരുന്നുകള്‍ക്കായി ഒരുക്കിയിട്ടുള്ളത്.
കുട്ടികളുടെ ഓര്‍മ്മശക്തിയും ബൗദ്ധീകമായ വികാസവും ലക്ഷ്യമാക്കിയാണ് പുസ്തകത്തിന്റെ ഉള്ളൊരുക്കല്‍ നടത്തിയിട്ടുള്ളത്. മൂന്നു വയസ് തികഞ്ഞ എല്ലാ പഠിതാക്കള്‍ക്കും 101 പേജുള്ള ഈ പുസ്തകം നല്‍കി കഴിഞ്ഞു. പുസ്തകങ്ങള്‍ പഠന ശേഷം അങ്കണവാടിയില്‍ തന്നെ സൂക്ഷിക്കാനാണ് ഇപ്പോള്‍ നിര്‍ദേശിച്ചിരിക്കുന്നത്.
മുന്‍മന്ത്രി ഡോ. എം.കെ മുനീര്‍ സാമൂഹ്യക്ഷേമ വകുപ്പിന്റെ ചുമതലക്കാരനായിരുന്നപ്പോഴാണ് പുസ്തകം രൂപപ്പെടുത്തിയത്. വര്‍ക്കര്‍മാര്‍ക്കും ഹെല്‍പ്പര്‍മാര്‍ക്കും ഇതിന്‍മേലുള്ള പരിശീലനം നാലുമാസം മുന്‍പേ നല്‍കി കഴിഞ്ഞു. കുറുമ്പന്‍ സംഘത്തിന്റെ ആഘോഷ തിമിര്‍പ്പാണ് വര്‍ക്ക് ബുക്കിന്റെ മനോഹരമായ പുറം ചട്ടയില്‍ ഉള്‍പ്പെടുത്തിയിട്ടുള്ളത്.