ഏറ്റുമാനൂര്‍: പൊതുവിദ്യാലയത്തില്‍ കുട്ടിയെ ചേര്‍ത്തതിനാല്‍ ജോലിയില്‍നിന്ന് പിരിച്ചുവിട്ടെന്ന് അമ്മയായ അണ്‍ എയ്ഡഡ് സ്‌കൂള്‍ അധ്യാപിക. ശ്രീകണ്ഠമംഗലം മണ്ണാര്‍കുന്ന് സെന്റ് ജോര്‍ജ് സ്‌കൂളിലെ സംഗീതാധ്യാപികയും അതിരമ്പുഴ പാലനില്‍ക്കുംപറമ്പില്‍ പി.ഡി പൊന്നപ്പന്റെ ഭാര്യയുമായ എസ്. സുഷമയെയാണ് ജോലിയില്‍നിന്ന് പിരിച്ചുവിട്ടെന്ന് ആരോപണമുയര്‍ന്നിരിക്കുന്നത്.
ഇതേ സ്‌കൂളില്‍ ആറാം ക്ലാസില്‍നിന്ന് വിജയിച്ച മകളെ ഏഴാം ക്ലാസില്‍ എയ്ഡഡ് വിദ്യാലയമായ കൈപ്പുഴ സെന്റ് ജോര്‍ജ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ ചേര്‍ത്തിരുന്നു. ഏറ്റുമാനൂര്‍ വിദ്യാഭ്യാസ ഉപജില്ലയില്‍ അതിരമ്പുഴ പഞ്ചായത്തിലെ 22-ാം വാര്‍ഡില്‍ സ്ഥിതി ചെയ്യുന്ന മണ്ണാര്‍ക്കുന്ന് സെന്റ് ജോര്‍ജ് സ്‌കൂളില്‍ എല്‍.പി വിഭാഗത്തിന് സംസ്ഥാന സര്‍ക്കാര്‍ അംഗീകാരമുണ്ട്. എന്നാല്‍ യു.പി വിഭാഗം സി.ബി.എസ്.ഇ സിലബസെന്ന് തെറ്റിദ്ധരിപ്പിച്ച് അംഗീകാരമില്ലാത്ത കോഴ്‌സാണ് നടത്തുന്നതെന്ന് സുഷമ ആരോപിക്കുന്നു.
അംഗികാരമില്ലാത്തതിനാല്‍ ഇടക്ക് സ്‌കൂള്‍ മാറേണ്ടി വരുന്നവര്‍ക്ക് വിടുതല്‍ സര്‍ട്ടിഫിക്കറ്റും കൊടുക്കില്ല. അതുകൊണ്ട് തന്നെ തന്റെ മകള്‍ അര്‍ച്ചനയ്ക്കും ടി.സി കിട്ടിയില്ല. കൈപ്പുഴ സ്‌കൂളില്‍ ഈ വിവരം പറഞ്ഞപ്പോള്‍ ജനന സര്‍ട്ടിഫിക്കറ്റ്, ആധാര്‍, ജാതി സര്‍ട്ടിഫിക്കറ്റ് എന്നിവ ഹാജരാക്കിയതിലൂടെ പ്രവേശനം നല്‍കിയെന്നും സുഷമ പറയുന്നു.
സുഷമയുടെ ഭര്‍ത്താവ് പൊന്നപ്പന്‍ കോട്ടയം ഗവ.കോളജിലെ ലൈബ്രറി അസിസ്റ്റന്റും എന്‍.ജി.ഒ യൂനിയന്‍ ജില്ലാ കൗണ്‍സില്‍ അംഗവുമാണ്. സുഷമ 15 വര്‍ഷമായി ഈ സ്‌കൂളിലെ അധ്യാപികയാണ്. മകളെ സര്‍ക്കാര്‍ ആഹ്വാനപ്രകാരമാണ് ഈ വര്‍ഷം കൈപ്പുഴയിലെ പൊതു വിദ്യാലയത്തില്‍ ഏഴാം ക്ലാസ്സില്‍ ചേര്‍ത്തതെന്നും ഇവര്‍ പറയുന്നു.
കുട്ടിയെ സ്‌കൂളില്‍ ചേര്‍ത്തതിന്റെ പിറ്റേന്ന് ജോലിയ്‌ക്കെത്തിയപ്പോള്‍ സ്‌കൂളിന്റ കവാടത്തില്‍ ഹെഡ്മിസ്ട്രസും കൂട്ടരും തടഞ്ഞുനിര്‍ത്തി. കുട്ടിയെ തിരികെ കൊണ്ടുവന്നിട്ട് ജോലിക്ക് കയറിയാല്‍ മതി യെന്നു പറയുകയായിരുന്നു.
അതേസമയം സ്ഥലം മാറിപ്പോകുന്ന താന്‍ ഇല്ലാത്ത സ്‌കൂളില്‍ അധ്യാപനം തുടരുന്നില്ലെന്ന് പറഞ്ഞ് സുഷമ സ്വയം പിരിഞ്ഞു പോകുകയായിരുന്നുവെന്നാണ് ഹെഡ്മിസ്ട്രസ് സി. ആന്‍സിറ്റ പറയുന്നത്. ഇപ്പോള്‍ ഏഴാം ക്ലാസ് വരെയുള്ള സ്‌കൂളില്‍ നാലാം ക്ലാസ് വരെ സ്റ്റേറ്റ് സിലബസാണെന്നും സി.ബി.എസ്.ഇ അഫിലിയേഷന് അപേക്ഷിച്ചിരിക്കുകയാണെന്നും അവര്‍ പറഞ്ഞു. തനിക്ക് നീതി ലഭിക്കണമെന്നും, സ്‌കൂളിനെതിരേ നടപടി സ്വീകരിക്കണമെന്നും ആവശ്യപ്പെട്ട് സുഷമ വിദ്യാഭ്യാസ മന്ത്രിക്കും ഡി.ഇ.ഒ, എ.ഇ.ഒ എന്നിവര്‍ക്കും പരാതി നല്‍കിയിട്ടുണ്ട്.