തേഞ്ഞിപ്പലം: വാഹനങ്ങള്‍ക്ക് ഭീഷണിയായതിനെ തുടര്‍ന്ന് മുറിച്ചു മാറ്റിയ മരങ്ങളുടെ തടികള്‍ റോഡരികില്‍ നിന്നു നീക്കം ചെയ്യാത്തത് കാല്‍ നടയാത്രക്കാരെ ദുരിതത്തിലാക്കുന്നു. ചെട്ടിപ്പടി റോഡില്‍ താഴെ ചേളാരിക്കടുത്ത് പാണക്കാട് പള്ളിക്ക് മുന്നിലാണ് മരത്തടികള്‍ റോഡരികില്‍ കുട്ടിയത്. ഒരു മാസം മുന്‍പാണ് ഇവിടെ അപകട ഭീഷണിയായി നിലനിന്നിരുന്ന മരം മുറിച്ചു മാറ്റിയത്. മുറിച്ച മരത്തടികള്‍ റേഡരികില്‍ കിടന്ന് പുല്‍കാടുകള്‍ മൂടി നശിക്കുന്നതിന് പുറമെ ഇതുവഴിയുള്ള കാല്‍നട യാത്രക്കാര്‍ക്കു പ്രയാസം സൃഷ്ടിക്കുന്നു. ഇതിന് പുറമെ, ചേറക്കോട് അങ്ങാടിയിലും തയ്യിലക്കടവ് പാലത്തിനടുത്തും ഇത്തരത്തില്‍ മുറിച്ചു മാറ്റിയ മരത്തടികളും കൊമ്പുകളും വെറുതെ കിടന്ന് നശിക്കുകയാണ്. ഇവ പരിസരവാസികള്‍ക്കൊ മറ്റോ ലേലം ചെയ്ത് വിറ്റാല്‍ വിറകിന്റെ ഉപയോഗമെങ്കിലും നടക്കും.